Изгледа дека старата приказна повторно оживеа – Европската Суперлига се враќа во насловите, а Реал Мадрид повторно е во центарот на вртлогот. Ако за момент читајќи го ова се почувствувавте како да се вративте назад во времето во 2021 година, не сте единствени!
Според информациите објавени од „The Athletic“, како и од „AS“ и „Financial Times“, шпанскиот гигант подготвува тужба против УЕФА вредна 4,5 милијарди евра, барајќи надомест за „загубена добивка“ поради блокирањето на проектот во 2023 година.
Од стара идеја до нов судски мегдан
Се сеќавате на хаосот од 2021-та, кога дванаесет елитни клубови решија да се одделат и да создадат сопствено натпреварување кое го нарекоа Европска Суперлига?
Проектот пропадна за само 48 часа под огромен притисок од навивачите, фудбалерите и политичарите, а УЕФА го прогласи за нелегален и го блокираше.
Но, три години подоцна, приказната добива продолжение. Судот во Мадрид во октомври 2025 година пресуди дека УЕФА и ФИФА навистина го злоупотребиле својот доминантен статус кога го спречиле проектот. Таа пресуда го отвори патот за клубовите, пред сè Реал Мадрид и Барселона, да побараат компензација.
Зошто токму 4,5 милијарди?
Според извори блиски до компанијата „A22“, која стои зад идејата за Суперлигата (сега ребрендирана како „Unify League“), Реал Мадрид смета дека токму толку изгубил од потенцијални приходи од ТВ права, билети и комерцијални договори.
Во бројки, тоа би било вклучено и т.н. „бонус за добре дојде“ од 200-300 милиони евра што клубовите требаше да го добијат за влез во Лигата, плус дополнителни 60 милиони за Реал и Барселона, како најатрактивни учесници.
Но, критичарите се сомневаат: како може да се бара компензација за нешто што никогаш не се случило?
„Ќе мора да докажат дека навистина изгубиле конкретни пари поради УЕФА, а не затоа што идејата беше непопуларна и нефункционална“, пишува „The Athletic“.
Тешка битка за докажување
Да се пресмета хипотетичка загуба е речиси невозможно. Реал ќе треба да покаже колку би заработил ако Суперлигата постоела и да го спореди тоа со реалните приходи од Лигата на шампионите.
Тоа не е мала сума. Само во последните пет години, „кралскиот клуб“ заработи повеќе од половина милијарда евра од УЕФА, секоја сезона добивајќи над 100 милиони евра од премии и ТВ права. И покрај постојаните критики, Реал бил најголемиот корисник на т.н. коефициентски фонд, систем кој го наградува успехот во последните десет години.
Сега клубот бара повеќе или, можеби, подобар договор.
Судска стратегија или политички притисок?
Некои европски медиуми сметаат дека Реал Мадрид не очекува буквално да добие 4,5 милијарди, туку дека се работи за поставување правен и економски притисок врз УЕФА со цел организацијата да ги „омекне правилата“ и да им даде поголема слобода на клубовите во идните проекти.
Се чини дека битката не е само за пари, туку и за контрола и моќ. За тоа кој го поседува фудбалот – клубовите кои го создаваат спектаклот, или институциите кои го регулираат.
Реал Мадрид – клуб кој заработува и кога губи
Денес, Реал Мадрид е најбогатиот фудбалски клуб во светот, со годишен приход над 1,18 милијарди евра. Новиот „Сантијаго Бернабеу“ се претвори во мултифункционален комплекс со концерти, настани и високо комерцијален потенцијал.
Со вакви бројки, некои ќе речат дека тужбата не е прашање на финансиска нужност, туку на принцип и престиж.
Каде води ова?
Процесот ќе трае со години. УЕФА веќе најави жалба до шпанскиот Врховен суд, а судската сага би можела да ја дефинира иднината на европскиот фудбал.
Дали ќе остане сегашниот модел каде елитата заработува, но сè уште игра под покровителство на УЕФА? Или пак, проектот на Флорентино Перез ќе ја врати идејата за Суперлига со нов имиџ, ново име, но старата цел: целосна независност и контрола над приходите?
Едно е сигурно – ова не е последен пат кога ќе ја слушнеме фразата Европска Суперлига.
