Постои едно непишано правило во американскиот спорт – ако му донесеш шампионска титула на Њујорк по повеќе од половина век чекање, твојот статус автоматски станува божествен и си обезбедуваш почит за цел живот. По синоќешниот триумф над Сан Антонио од 94-90, запечатен со клучните слободни фрлања на О.Џи Ануноби во финишот, Џејлен Брансон официјално седна на спортскиот престол на Менхетен. Леворакиот плејмејкер кој со 45 поени ги преслуша „Спарси“ е прогласен за најкорисен играч (МВП) на НБА финалето, влегувајќи во друштво на вечните легенди на овој град како Дерек Џитер (Јенкис), Илај Манинг (Џајантс) и Марк Месие (Ренџерс).
Додека навивачите плаќаа помеѓу 5.000 и 50.000 долари за билет за да бидат сведоци на историјата, вистината е дека самиот Брансон плати многу повеќе од сите нив за оваа титула. Неговиот најголем шампионски потег не се случи синоќa на паркетот, туку пред точно две години, на преговарачката маса.
Потегот што го шокираше бизнисот: Како се купува НБА прстен
Во летото 2024 година, Брансон направи потег кој беше сметан за невиден и тотално луд преседан во модерната ера на кошарката. Наместо да почека до 2025 година, кога автоматски ќе имаше право да потпише супермакс договор вреден 269 милиони долари за пет години, тој реши предвреме да стави потпис на четиригодишно продолжување вредно 156.5 милиони долари. Со тоа, тој свесно остави неверојатни 113 милиони долари на масата.
Зошто го направи тоа? Одговорот пристигна синоќа во форма на трофејот „Лари О’Брајан“. Со тоа што Брансон се откажа од парите, тој му овозможи на менаџментот на Никс огромен простор во буџетот за да донесат сериозни засилувања. Без таа негова финансиска жртва, во Њујорк никогаш немаше да пристигнат ѕвездите како Карл-Ентони Таунс и Микал Бриџис. Брансон свесно ги жртвуваше личните милиони за да изгради армија која денес е на врвот на светот.
„Тој го постави шампионскиот стандард уште пред да згазне на теренот. Да бев на негово место, искрено не знам дали ќе го направев истото и дали ќе се откажев од тие пари“, призна отворено неговиот тренер Мајк Браун за време на шампионското славење.
Семејна династија и брутална промена на историјата
Оваа титула донесе и една прекрасна, филмска емотивна приказна. Имено, Џејлен Брансон не само што го круниса Њујорк, туку донесе шампионски прстен и во сопствената куќа. Неговиот татко, Рик Брансон, во минатото со гордост го носеше дресот на Никс, а денес работи како прв помошник-тренер на својот син во стручниот штаб на Мајк Браун. Таткото на шега изјави дека веднаш ќе му го одземе МВП трофејот на синот за да го стави во својата витрина.
Колку е брутален ефектот на Брансон врз оваа франшиза најдобро говорат суровите статистички факти. Пред неговото пристигнување во 2022 година, Њујорк имаше само четири успешни сезони со позитивен скор во период од цели 21 година. Со Брансон во тимот, Никс имаат четири успешни сезони по ред во изминативе четири години. За овој краток престој, тие победија во осум плејоф серии, што е повеќе отколку што комплетниот клуб успеа да победи во вкупниот период од 1998 до 2022 година (седум серии).
Брансон синоќе се зацврсти во најтесната елита на кошаркарски суперѕвезди. Тој веќе три години по ред е Ол-Стар играч со просек од над 26 поени по натпревар, криминално потценет во трките за сезонски МВП. Единствените преостанати играчи во светот кои го одржаа тој застрашувачки висок ритам во изминативе три сезони се Никола Јокиќ, Шеј Гилџус-Александер, Кевин Дурант и Јанис Адетокумбо. Сите тие се НБА шампиони. Од денес, во таа просторија седи и „кралот“ од Медисон Сквер Гарден.
