По шокантната најава на Мохамед Салах, навивачите на Ливерпул се соочуваат со уште едно болно збогување. Клубот официјално потврди дека Енди Робертсон, легендарниот лев бек и капитен на Шкотска, ќе го напушти „Енфилд“ по завршувањето на оваа сезона.
По девет години исполнети со борбеност, спринтови по левата страна и многу трофеи, 32-годишниот Робертсон заминува како слободен агент по истекот на неговиот договор.
Најдобрата зделка во модерната историја на клубот
Кога пристигна од Хал Сити за само 10 милиони фунти во 2017 година, малкумина предвидуваа дека „Робо“ ќе стане еден од најдобрите на својата позиција во светот. Со 373 настапи, 13 гола и неверојатни 69 асистенции, тој ги освои сите можни трофеи: две титули во Премиер лигата, Лигата на шампионите, ФА Купот, два Лига купа, Светското клупско првенство и Суперкупот на УЕФА.
„Вложив срце и душа во овој клуб во изминатите девет години и немам за што да жалам. Сега е време за нов предизвик, но спомените од Ливерпул ќе ги носам засекогаш“, изјави емотивниот Робертсон за клупскиот сајт.
Трка за потписот на легендата
Иако оваа сезона ја загуби стартната позиција од младиот Милош Керкез (започна само 6 меча во Премиер лигата), Робертсон сè уште е баран на пазарот. Тотенхем веќе подолго време работи на неговиот ангажман, а интерес покажа и Атлетико Мадрид. Како слободен играч, Шкотланѓанецот ќе може да бира каде ќе ја продолжи кариерата, а неговиот професионализам и искуство се магнет за топ-клубовите.
Relentless Robbo ❤️ pic.twitter.com/XTRl6AhrEm
— Liverpool FC (@LFC) April 9, 2026
Наследството на Енди Робертсон
Аналитичарите се согласни: Робертсон го редефинираше значењето на бековската позиција заедно со Трент Александер-Арнолд. Неговиот неверојатен пресинг против Манчестер Сити и моментот кога му „влезе под кожа“ на Лионел Меси во легендарниот пресврт против Барселона, се моменти кои засекогаш ќе останат во меморијата на „Коп“.
Заедно со Салах, Робертсон ќе добие заслужено и емотивно испраќање на последниот домашен меч на „Енфилд“. Ливерпул веќе го има неговиот наследник во Керкез, но карактерот и лидерството на шкотскиот капитен тешко ќе бидат заменети.
