Само пред три дена, Габриел Мартинели беше распнат од англиската јавност. По обидот насила да го изнесе повредениот Конор Бредли од теренот на дербито со Ливерпул, многумина го нарекоа „идиот“ и „неспортски играч“. Но, во фудбалот, најдобриот одговор секогаш се дава на теренот.
Бразилецот денеска го постигна својот прв хет-трик во дресот на Арсенал, предводејќи ги „топџиите“ до пресврт и победа над Портсмут во ФА Купот.
Артета: Тоа е карактер!
Микел Артета не штедеше пофалби за својот крилен напаѓач, нагласувајќи дека токму ваквите моменти дефинираат голем играч.
„Потребна е силна личност за да играш за голем клуб. Пред три дена сите зборуваа за еден негов потег, а денеска тој постигна три гола. Габи е таков, без разлика дали игра добро или лошо, тој утре на тренинг ќе даде 100% од себе. Тоа е неговиот карактер“, изјави Артета по мечот.
Артета исто така му се заблагодари на тренерот на Ливерпул, Арне Слот, кој по дербито во четвртокот застана во одбрана на Мартинели, смирувајќи ги тензиите.
Доминација од прекини: Прв хет-трик по ера на Волкот
Мартинели стана првиот играч на Арсенал со хет-трик во ФА Купот по Тео Волкот во 2017 година. Интересно е што две од трите гола Бразилецот ги постигна со глава по корнери, потврдувајќи ја апсолутната доминација на Арсенал при прекините под водство на Николас Жовер.
Арсенал сезонава има постигнато рекордни 17 голови од корнер во сите натпреварувања, повеќе од било кој друг премиерлигаш.
Арсенал „гази“ на сите фронтови
Победата над Портсмут е само почеток на пеколниот распорет од четири гостувања во четири различни натпреварувања. „Топџиите“ во моментов се лидери во Премиер лигата, доминираат во групата во Лигата на шампионите, а сега сигурно газат и во ФА Купот. Со Мартинели во ваква форма, сонот за трофеј по пет години изгледа многу реално.
