Фудбалскиот клуб Челси попладнево стави крај на шпекулациите и официјално го именуваше Лијам Росиниор за нов главен тренер на машкиот тим. Англискиот стратег пристигнува на „Стемфорд Бриџ“ со неверојатна доверба од раководството, потпишувајќи договор кој го врзува за клубот дури до 2032 година.
Овој потег се гледа како „интерна промоција“ во рамките на сопственичката групација „BlueCo“, бидејќи Росиниор доаѓа од сестринскиот клуб Стразбур.
Од „чирак“ на Руни до европски успех со Стразбур
Иако има само 41 година, Росиниор веќе има богато тренерско искуство. Својот занает почна да го пече во Дерби Каунти, каде што првично работеше како асистент на легендарниот Вејн Руни, а подоцна и како привремен менаџер во тешки времиња за клубот.
Вистинската афирмација ја доживеа на клупата на Хал Сити. Преземајќи го тимот во ноември 2022 година, тој успеа да го трансформира од кандидат за испаѓање во тим кој се бори за плеј-оф, завршувајќи на 7-то место во сезоната 2023/24.
Круна на неговата досегашна работа беше преселбата во Франција. Во својата дебитантска сезона со Стразбур, Росиниор го одведе клубот до 7-то место и историски пласман во европските натпреварувања (Конференциска лига) за првпат по 19 години, промовирајќи модерна игра со млади фудбалери.
Искусен премиерлигашки дефанзивец
Пред да седне на клупата, Росиниор имаше респектабилна играчка кариера како десен бек, поминувајќи повеќе од 15 години во англискиот фудбал. Тој забележа вкупно 393 сениорски настапи, играјќи за клубови како Фулам, Ридинг, Ипсвич и Брајтон.
Најголемиот успех како играч го постигна со дресот на Хал Сити, со кој стигна до финалето на ФА Купот во 2014 година, каде што загубија од Арсенал по продолженија. Росиниор беше и младински репрезентативец на Англија (У21), а кариерата ја заврши во 2018 година во дресот на Брајтон.
Росиниор: „Ова е огромна чест“
Во својата прва изјава како менаџер на „Сините“, Росиниор не го криеше своето воодушевување.
„Исклучително сум почестен што сум именуван за главен тренер на Челси. Ова е клуб со уникатен дух и горда историја. Мојата работа е да го заштитам тој идентитет и да создадам тим што ќе ги одразува вредностите на заедништво и пожртвуваноста“, изјави Росиниор.
Од клубот истакнаа дека Росиниор доаѓа со одговорност да обезбеди Челси да се натпреварува на највисоко ниво, но и да продолжи со фокусот на развојот на играчите.
Words from Liam Rosenior. 💬💙
— Chelsea FC (@ChelseaFC) January 6, 2026
Chelsea Football Club is delighted to announce the appointment of Liam Rosenior as head coach of the men’s team.
— Chelsea FC (@ChelseaFC) January 6, 2026
Welcome to Chelsea, Liam! 🔵
