Лос Анџелес Лејкерс навреме ја завршија една од најважните задачи за ова лето. Одличниот бек Остин Ривс се согласи на нов четиригодишен договор вреден вртоглави 185 милиони долари за да остане во тимот.
Според извори од лигата, 28-годишниот Ривс претходно одби играчка опција од „само“ 14,9 милиони долари со цел да стане слободен агент. Сепак, тој ја прифати новата понуда за време на ексклузивниот прозорец за преговори што го имаат тимовите со своите играчи, тргајќи го своето име од пазарот пред официјалниот почеток на преодниот рок на 30 јуни.
Дончиќ стави вето: Без Ривс во трејд за Јанис!
Овој договор го бетонира Ривс како главен партнер на Лука Дончиќ во бековската линија на Лејкерси. Ова е желба што Словенецот јасно им ја стави до знаење на челниците на клубот во текот на изминатата година.
Всушност, извори од лигата откриваат дека Дончиќ отишол дотаму што побарал од управата на Лејкерс да не го вклучуваат Ривс во апсолутно ниту еден потенцијален трејд-пакет за поранешниот МВП, Јанис Адетокунбо. Ваквата доверба од првата ѕвезда на тимот очигледно одиграла голема улога во одлуката брзо да се финализира новиот мега-договор.
Неверојатен напредок и играње преку болка
Остин Ривс помина долг пат откако пристигна во Лејкерси како недрафтуван слободен агент. Неговата статистика растеше од сезона во сезона, од скромни 7,3 поени, 3,2 скока и 1,8 асистенции во дебитантската година, до импресивни 23,3 поени, 4,7 скока и 5,5 асистенции минатата сезона.
Покрај талентот, тој ја докажа и својата издржливост, борејќи се со повреди во последните две плејоф кампањи. Во 2025 година играше со сериозна повреда на прстот на ногата за време на поразот од Минесота Тимбервулвс, додека во постсезоната 2026 се врати по истегнување на мускулот (Grade 2) за да одигра шест натпревари против Хјустон Рокетс и Оклахома Сити Тандер.
Генералниот менаџер на Лејкерси, Роб Пелинка, по завршувањето на сезоната јасно стави до знаење колку Ривс му значи на тимот: „Тој го започна своето патување тука како Лејкер и ни стави до знаење дека сака да го продолжи токму тука. И ние го чувствуваме истото. Сакаме неговата одисеја да продолжи да се развива во виолетово-златниот дрес.“
Што е следно за „Езерџиите“?
Додека Лејкерси се подготвуваа за драфтот, тие веќе започнале прелиминарни разговори и со претставниците на Леброн Џејмс за неговиот статус во тимот. Во меѓувреме, франшизата има можност за ексклузивни преговори и со останатите свои слободни агенти како Руи Хачимура, Џексон Хејс и Лук Кенард.
