Италијанскиот шампион Интер и официјално го потврди својот нов голем трансфер – во Милано пристигнува младиот француски напаѓач Анж-Јоан Бони. 21-годишниот фудбалер доаѓа од редовите на Парма, каде што минатата сезона експлодираше и го привлече вниманието на цела фудбалска Европа.
Приказната на Бони е приказна за сон и истрајност. Роден во Обервилие, скромно предградие на Париз во чија близина се наоѓа моќниот “Стад де Франс”, од родители од Брегот на Слоновата Коска, тој го започнал својот фудбалски пат низ помали француски клубови, пред на неполни 18 години да ја напушти Франција и да се пресели во Парма.
По една сезона на адаптација, сезоната 2023/24 беше онаа во која блесна, станувајќи клучен играч во тимот на Парма кој доминантно избори пласман во Серија А. Минатата сезона, во својот прв настап во елитата, тој имаше моќен импакт – беше прогласен за играч на натпреварот уште во првото коло против Фиорентина, а сезоната ја заврши со 37 настапи и 6 гола.
Неговата возбуда за доаѓањето во голем клуб како Интер е очигледна.
“Пробувам многу емоции, пресреќен сум што сум тука. За мене, ова е остварување на детскиот сон”, беа првите зборови на Бони за Inter TV. “Гладен сум за успеси и сакам да напредувам. Ќе ги гледам Лаутаро и Турам секој ден на тренинг, како со очи на дете, и ќе се обидам да научам сè од нив”.
Бони е опишан како модерен напаѓач – брз, моќен и мобилен, кој игра за тимот и создава шанси за соиграчите. Тој е 26-тиот Французин во историјата на Интер, а во клубот повторно ќе соработува со Кристијан Киву, кој му беше тренер во последните месеци во Парма.
“Мистер Киву многу ми помогна и имаше верба во мене. Пресреќен сум што повторно ќе соработуваме”, додаде Бони.
Со желба да ги следи стапките на своите сонародници како Турам, Џоркаеф и Виера, Анж-Јоан Бони го започнува новото, „нероаѕурно“ поглавје од својот сон.
