Во Белград беше одржана втората седница на Управниот одбор на новата Регионална ракометна лига (РРЛ), на која беа донесени клучни одлуки за непречен старт на историската прва сезона 2026/27. Проектот кој обединува клубови од Македонија, Србија, Црна Гора, Хрватска и Словенија добива сè појасни контури, а најновите вести носат огромно олеснување за самите екипи.
Максимално растоварување: Фокус исклучиво на ракометот
Најважната одлука од седницата е усвојувањето на финансискиот план, кој предвидува Лигата целосно да ги покрие трошоците за судиите и делегатите за сите 94 планирани натпревари. Со ова, клубовите се значително финансиски растоварени, а воедно е донесена и одлука за единствен и транспарентен систем за судиските надоместоци.
Како што се наведува во официјалното соопштение:
„Регионалната лига стартува во својата прва сезона со финансиска стабилност, професионална екипа и систем дизајниран максимално да ги растовари клубовите, оставајќи им простор да се посветат исклучиво на најбитното – ракометната игра.“
Професионален тим и обезбедени спонзори
Управниот одбор, со кој претседава Иван Миливојевиќ, официјално ја именуваше прославената црногорска ракометарка Милена Раичевиќ за извршна директорка на Лигата (со мандат од две сезони) и даде согласност за ангажман на персонал во канцеларијата. Седиштето на Лигата во Подгорица интензивно се опремува за да биде целосно оперативно пред стартот на сезоната.
Членовите на одборот беа информирани дека се веќе договорени клучните спонзорства кои гарантираат финансиска стабилност. Планот вклучува и професионална стриминг-продукција на сите мечеви, како и силна промоција на Ф4 турнирите (закажани за пролетта 2027 година) во двете конкуренции.
Македонските претставници спремни за предизвикот
Првото коло во машката МРХЛ лига е закажано за 23 август 2026 година, додека женската ВРХЛ лига ќе стартува нешто порано за Групата А (со договор на клубовите), односно првиот викенд во септември за Групата Б.
Македонија ќе има исклучително силно присуство во регионалното натпреварување. Кај мажите, честа ќе ја бранат гигантите Вардар и Еурофарм Пелистер, заедно со Охрид и Алкалоид. Во женска конкуренција, македонски претставници во Групата Б се екипите на Ѓорче Петров и Чаир. Време е за врвен ракомет!
