Понеделничкиот сончев ден во Манчестер донесе сцени кои долго ќе се прераскажуваат. Десет години откако за првпат зачекори на „Етихад“, Пеп Гвардиола и дефинитивно кажа последно збогум. По традиционалното дефиле со отворен автобус низ преплавените градски улици, десетици илјади навивачи се собраа на специјалната церемонија во „Ко-оп Лајв“ арената за да му оддадат почит на човекот кој целосно ја трансформираше историјата на клубот, но и на целиот англиски фудбал.
Ова беше емотивна вечер во која градот не се збогуваше само со својот фудбалски архитект, туку и со неговите двајца најверни војници на теренот, Бернардо Силва и Џон Стоунс, кои исто така го напуштаат клубот ова лето.
Последната порака на Пеп: „Ќе ве носам во срцето до крајот на животот“
Церемонијата на сцената донесе вистински спој на минатото и сегашноста. Покрај актуелните ѕвезди Ерлинг Халанд и Фил Фоден, се појавија и култните поранешни капитени како Винсент Компани и Фернандињо. Еден по еден, тие на сцената ги изнесоа сите 20 трофеи кои Сити ги освои под водство на каталонскиот менаџер.
Во највпечатливиот момент на вечерта, во друштво на легендата на групата Oasis и голем навивач на Сити, Ноел Галагер, Гвардиола излезе пред микрофонот за да ја испрати својата последна порака.
„Прво, ви благодарам на сите што дојдовте тука вечерва за да се збогуваме. Навистина ја чувствувам таа силна поврзаност со навивачите уште од мојата прва минута во клубот. Немам доволно зборови за да ја искажам мојата благодарност. Ве уверувам дека ќе го носам овој клуб и сите вас во моето срце до крајот на мојот живот“, изјави емотивниот Гвардиола.
The pleasure will always be ours, Pep 🥺🩵 pic.twitter.com/M6SEck9qKq
— Manchester City (@ManCity) May 25, 2026
Ten years that will live forever.
— Manchester City (@ManCity) May 24, 2026
Thank you for everything, Pep 🩵 pic.twitter.com/eEFr8RPirx
“It has been an incredible, tremendous honour to be your manager.” 🥺🩵 pic.twitter.com/4jPR12RBE6
— Manchester City (@ManCity) May 24, 2026
Неделното испраќање на „Етихад“ донесе многу емоции
Оваа празнична атмосфера беше само продолжение на емотивниот викенд. Синоќа, на натпреварот од последното коло во Премиер лигата против Астон Вила, Гвардиола го водеше својот 593. и последен натпревар на клупата на Сити. Иако гостите од Бирмингем славеа со 1:2 со головите на Оли Воткинс, резултатот брзо падна во втор план по последниот судиски свиреж.
Целиот стадион се поклони пред легендите во заминување – Пеп, Стоунс и Бернардо Силва, а специјален аплауз добија и поранешните играчи Илкај Гундоган и голманот Едерсон, кои беа присутни на церемонијата за збогување. Португалскиот виртуоз Бернардо Силва, кој воедно е и најкористениот играч во ерата на Пеп со дури 460 настапи, по мечот даде искрена изјава која најдобро ја опишува нивната врска.
„За почеток, тој за мене е најголемиот менаџер на сите времиња. Пеп е мојот фудбалски татко. Бескрајно сум му благодарен за начинот на кој веруваше во мене, како ме поддржуваше во тешките моменти и како ме научи да го гледам фудбалот на сосема поинаков начин“, изјави Силва, кој додаде дека Манчестер засекогаш ќе остане негов втор дом.
И покрај разделбата, Гвардиола на својата последна прес-конференција истакна дека го остава клубот во перфектна позиција за понатамошни успеси и ги советуваше навивачите да уживаат во самиот процес, а не само во крајните трофеи.
Наследството на еден визионер: Бројки кои граничат со научна фантастика
Десетгодишниот престој на Пеп Гвардиола во Англија не донесе само доминација, туку комплетно ги препиша рекордите во модерната ера на фудбалот. Каталонецот заминува како менаџер со најмногу натпревари во историјата на Сити (593), надминувајќи го рекордот на Лес Мекдауал (592).
Зад него останува наследство од 20 големи трофеи, вклучувајќи ја историската прва титула во Лигата на шампионите и нестварните четири последователни титули во Премиер лигата – рекорд кој никогаш претходно не бил поставен во англискиот фудбал. Во неговата златна ризница се наоѓаат и три ФА Купови, пет Лига купови, три Комјунити шилд трофеи, како и по еден пехар од УЕФА Суперкупот и Светското клупско првенство. Сити стана и единствениот тим кој во рок од 12 месеци ги држеше сите пет најважни клупски меѓународни и домашни трофеи истовремено.
Статистиката покажува брутална доминација во изминатата деценија:
- Процент на победи: Нестварни 70% успехот на вкупно 593 натпревари (416 победи). Во Премиер лигата тој оствари 269 победи на 380 мечеви, што го става далеку пред легендите како Алекс Фергусон (65.2%), Јирген Клоп (62.5%) и Жозе Мурињо (59.2%).
- Освоени бодови: Под негово водство, Сити освои вкупно 865 бодови во Премиер лигата (просечно 87 по сезона), дури 64 бодови повеќе од Ливерпул и над 200 бодови повеќе од Манчестер Јунајтед во истиот десетгодишен период. Тој е најбрзиот менаџер во историјата кој стигнал до 500, 600, 700 и 800 првенствени бодови.
- Голови и одбрана: Неговата филозофија донесе вкупно 1.423 постигнати голови во сите натпреварувања, со вкупна гол-разлика од фантастични +901. Воедно, Сити запиша најмногу натпревари без примен гол во Европа во овој период со дури 252 чисти мрежи.
Како уште еден доказ за неговата вечна трага, клубот објави дека северната трибина на стадионот официјално ќе биде преименувана во „Трибина Пеп Гвардиола“. Еден визионер заминува, но фудбалската револуција која ја донесе во Манчестер останува да живее како нов стандард во светот на спортот.
