Проблемите за Педро Нето во дресот на Челси се таложат. Откако веќе ја одлежа автоматската суспензија за црвениот картон заработен на „Емирати“, крилниот напаѓач денеска доби уште една лоша вест од Фудбалската асоцијација (ФА) – дополнителен натпревар забрана и солена парична казна.
Недолично однесување и „тешка“ казна
Инцидентот се случи на 1 март за време на поразот од Арсенал, кога Нето доби два жолти картони во рок од три минути. ФА одлучи да го казни дополнително поради неговата реакција по исклучувањето. Португалецот беше обвинет дека бавно го напуштал теренот и користел навредливи зборови кон судиите.
Епилогот од сослушувањето е суспензија од уште еден меч (што значи дека ќе го пропушти утрешниот дуел со Њукасл) и парична казна од огромни 70.000 фунти. Нето веќе ја призна вината за своето однесување, надевајќи се на поблага санкција, но ФА реши да испрати јасна порака.
УЕФА исто така „стега“ по инцидентот во Париз
Како дополнителната казна во Англија да не беше доволна, Нето сега се соочува и со дисциплинска постапка од УЕФА. Причината е неговото туркање на собирач на топки за време на катастрофалниот пораз од ПСЖ (5-2) во Лигата на шампионите минатата среда.
Додека тој веќе му се извини на момчето, УЕФА би можела да му изрече суспензија токму пред реваншот на „Стамфорд Бриџ“ следната недела. Менаџерот на Челси, Лијам Росениор, се обиде да ја смири ситуацијата, велејќи дека Нето мора да научи од своите грешки.
„Ја видов снимката од Париз и не изгледа добро. Ја разбирам неговата желба за победа, но постојат начини како тоа се покажува. Импресиониран сум што самиот сакаше да се извини веднаш, но најважно е овие грешки да не се повторуваат“, изјави Розениор.
Со оглед на тоа што Челси веќе има девет различни играчи со црвени картони оваа сезона, дисциплината станува најголемиот непријател на „сините“ во трката за Европа.
