На врвот на табелата во Премиер лигата работите можеби почнуваат да изгледаат јасни по неколкуте кикса на Манчестер Сити и „бегството“ на Арсенал на врвот, но на дното на табелата се води жестока и неизвесна борба.
Додека Волвс и Барнли веќе се со една нога во Чемпионшип, вистинската драма се одвива меѓу четирите клуба кои одбиваат да бидат „третиот патник“. Викендов помина во знакот на реми исходи за сите загрозени екипи, но атмосферата во нивните табори е сосема различна.
Вест Хем го „сопре“ Сити, но остана во опасната зона
„Чеканите“ на Нуно Еспирито Санто приредија изненадување со ремито (1-1) против Манчестер Сити. Иако овој бод против кандидатот за титула е огромен, Вест Хем сепак падна на 18-то место поради гол-разликата. Тимот од Лондон е во најдобра форма меѓу загрозените, освојувајќи 15 бода на последните девет меча, но пеколниот распоред до крајот (вклучувајќи го и Арсенал) не им дава мир.
Нотингем Форест „преживеа“ против Фулам
Форест одигра 0-0 со Фулам во меч во кој имаа повеќе од играта, но им недостасуваше среќа. Поништен гол поради офсајд и пречката на Ола Аина беа премногу за навивачите на „Сити Граунд“. Со овој бод, тимот на Витор Переира се искачи над „цртата“ само благодарение на подобрата гол-разлика од Вест Хем. Нивниот следен меч е гостување кај Тотенхем, кој Переира го опиша како „битка за живот“.
Тотенхем и Тудор до првиот бод во „невозможни“ услови
Игор Тудор конечно почувствува како е да се освои бод во Премиер лигата. Десеткуваниот Тотенхем, со само 12 расположливи играчи, извлече 1-1 на „Енфилд“ против Ливерпул со голот на Ришарлисон во 90. минута.
„Ова е нешто големо за нас. Дојдовме со 12 играчи во овој храм на фудбалот и верувавме до крај“, изјави Тудор, кој полека ја враќа самодовербата во тимот пред клучните дуели.
Лидс со десетмина „извлече“ реми во Лондон
Лидс Јунајтед останува на 15-то место со 32 бода по ремито без голови против Кристал Палас. Тимот на Даниел Фарке можеше да победи доколку Калверт-Луин не го промашеше пеналот во првиот дел, но по црвениот картон на Гудмундсон, бодот на „Селхерст Парк“ стана исклучително вреден.
Табела на дното (по 30 кола):
15. Лидс – 32 бода
16. Тотенхем – 30 бодови
17. Нотингем Форест – 29 бодови (-15 ГР)
18. Вест Хем – 29 бодови (-19 ГР)
