Во ера на тика-така, пресинг и тактички иновации, едно старо и често потценувано „оружје“ повторно станува актуелно – долгиот аут. Легендарниот Рори Делап своевремено го направи ова свој заштитен знак во Стоук Сити, а сега тренери како Мик Мекарти и Тони Пјулис прашуваат: Зошто клубовите го игнорираат овој ефективен метод?
Мекарти неодамна даде изјава која ја разбранува јавноста:
„Клубовите плаќаат милиони за крила кои можат да претрчаат играч, да стигнат до гол-аут линијата и да центрираат на глава на напаѓачот. Вистината е дека со аут можете да ја ставите топката на истото место, дури и попрецизно отколку со нога. Зошто не би го искористиле ова?“.
Пјулис: „Венгер мразеше кога губеше од нас“
Тони Пјулис, човекот кој го изгради „тврдиот“ Стоук Сити, се потсетува на дуелите со Арсенал на Арсен Венгер, каде што долгите аути беа клучно оружје.
„Арсен Венгер мразеше да губи од нас. Само се жалеше цело време. Психолошки, доаѓањето на ’Британија‘ стадионот им беше премногу“, вели Пјулис, додавајќи дека е иронично што сега и големите тимови (како Арсенал денес) почнуваат да користат прекини и долги топки како легитимна тактика.
Дали е „анти-фудбал“ или паметна тактика?
Додека некои фанови сметаат дека ова е „грдо“ за гледање и го забавува ритамот, статистиката покажува дека прекините се сè поважен дел од играта. Арсенал оваа сезона доминира токму преку корнери и прекини, докажувајќи дека во модерниот фудбал секоја предност е важна.
Дали сме сведоци на ренесанса на „ол-скул“ фудбалот или ова е само минлив тренд?
Следете нè: Facebook | Instagram | X
