Викендот во Монтреал се претвора во апсолутна демонстрација на моќ на тимот на Мерцедес, но и во најава за внатрешна војна за титулата која веќе ги загрижи шефовите во Бракли. По контроверзниот триумф во саботната спринт-трка, каде што едвај преживеа близок контакт со својот тимски колега, Џорџ Расел неколку часа подоцна удри нов печат на патеката „Жил Вилнев“, освојувајќи ја и главната пол-позиција за неделното Гран-при на Канада.
Катастрофалниот викенд за дел од ветераните продолжи и во квалификациите, додека Мерцедес уште еднаш го заклучи првиот стартен ред во пресрет на трката која ветува тотален хаос поради најавените врнежи од дожд.
Искри во спринтот: Борба тркало до тркало и соиграч на трева
Дека новите аеродинамични надградби на Мерцедес донесоа застрашувачка брзина беше јасно уште во спринт-трката во која Расел тргна од пол-позицијата. Но, патот до првите 8 бода беше сè освен мирен. Британецот мораше да издржи брутален притисок од 19-годишниот Кими Антонели. Возачите на Мерцедес за првпат сезонава ги задржаа позициите по првиот свијок, но набрзо страстите зовреа.
По неколку остри дефанзивни маневри на Расел, болидите ги удрија тркалата, по што Италијанецот беше принуден со дел од болидот да излета на тревата. Иако од боксот на Антонели бурно бараа казна за Расел, стјуардите решија дека нема елементи за истрага. Овој инцидент максимално го искористи Ландо Норис со Мекларен, кој со одличен ритам го претекна разнишаниот Антонели и му го украде второто место, оставајќи го младиот Италијанец да се задоволи со третата позиција. На задните позиции, Оскар Пјастри заврши како четврти по доцниот пресврт против Луис Хамилтон (Ферари), додека Шарл Леклер ја заокружи првата петорка.
Mercedes hold the advantage, and Hamilton makes his way through on Piastri! 😎
— Formula 1 (@F1) May 23, 2026
Here’s how the start of the Sprint unfolded! 👀👇#F1Sprint #CanadianGP pic.twitter.com/JKGYmsj4Qb
THE SCENES!! 🤯
— Formula 1 (@F1) May 23, 2026
Russell and Antonelli fight for the lead once again! 👀#F1Sprint #CanadianGP pic.twitter.com/N12CkUS0RF
Квалификациска драма и коцка со „дождлив“ сет-ап
Преминот од спринт во класичен квалификациски режим секогаш е психолошки тежок предизвик за возачите, со оглед на тоа што болидите се однесуваат сосема поинаку. Во клучните моменти од SQ3, Расел уште еднаш извлече магичен круг „од никаде“, поставувајќи недостижно време од 1:12.965. Неговиот најблизок ривал Антонели повторно доцнеше за идентични, минимални 68 илјадити делови од секундата.
„Секогаш е тешко да се вратиш на патеката веднаш по спринтот бидејќи болидот се чувствува комплетно поинаку. Тој последен летечки круг излезе буквално од никаде. Прекрасно чувство е кога ќе успееш да составиш сè во една вака напната сесија. Ова беше епски“, изјави задоволниот Расел, откривајќи дека тимот свесно направил измени во сет-апот, жртвувајќи дел од брзината на суво бидејќи утрешната прогноза најавува сериозни врнежи.
Мекларен потврди дека е најблизок придружник на лидерот. Ландо Норис заврши на треттото место со само 150 илјадити делови заостанување, потенцирајќи дека е среќен што тимот е многу поблиску до Мерцедес во споредба со петочните тренинзи. Зад него, од вториот ред ќе стартува Оскар Пијастри, додека Луис Хамилтон со своето Ферари повторно се претплати на петтата позиција.
Макс Верстапен имаше уште еден разочарувачки ден во својот Ред Бул и ќе тргне дури како шестти, успевајќи во финишот да го победи својот помлад клупски колега Исак Хаџар за ситни 0.028 секунди. Првата десетка ја комплетираа Шарл Леклер, младиот Арвид Линдблад од Рејсинг Булс и Франко Колапинто кој направи подвиг со пласманот во SQ3 со својот болид на Алпин.
Дебакл за ветераните уште во Q1
Најголемите изненадувања и разочарувања се случија на самиот старт од квалификациите. Најмалку очекувано беше тоталното потфрлање на возачите на Астон Мартин на нивната домашна патека. По големото излетување во петокот, Фернандо Алонсо го заврши својот настап уште во Q1 на 19-та позиција, веднаш пред домашниот возач Ленс Строл.
Ништо подобро не помина ниту Серхио Перез во Кадилак, кој се квалификуваше на очајното 20-то место, додека друштво во зоната на елиминација во првиот сегмент им правеа Окон, Албон и Валтери Ботас. Во вториот сегмент (Q2), покрај Хулкенберг, Лосон, Бортолето и Гасли, најзвучно име кое отпадна беше Карлос Саинц во Вилијамс, како и младиот Оли Берман кој утре ќе тргне од 16-та позиција.
Комплетни резултати од главните квалификации во Канада:
- Џорџ Расел (Мерцедес) — 1:12.965
- Кими Антонели (Мерцедес) — +0.068
- Ландо Норис (Мекларен) — +0.151
- Оскар Пијастри (Мекларен) — +0.203
- Луис Хамилтон (Ферари) — +0.290
- Макс Верстапен (Ред Бул) — +0.329
- Исак Хаџар (Ред Бул) — +0.357
- Шарл Леклер (Ферари) — +0.398
- Арвид Линдблад (Рејсинг Булс) — +0.702
- Франко Колапинто (Алпин) — +1.110
Испаднати во Q2: Нико Хулкенберг (Ауди), Лиам Лосон (Рејсинг Булс), Габриел Бортолето (Ауди), Пјер Гасли (Алпин), Карлос Саинц (Вилијамс), Оли Берман (Хас).
Испаднати во Q1: Естебан Окон (Хас), Алекс Албон (Вилијамс), Фернандо Алонсо (Астон Мартин), Серхио Перез (Кадилак), Ланс Строл (Астон Мартин), Валтери Ботас (Кадилак).
