Денеска во Куманово официјално започнува 20-тото коло во Првата македонска фудбалска лига. По минатонеделниот пораз од Вардар, фудбалерите на Башкими се враќаат пред својата публика со императив за победа против тимот на АП Брера.
Удар за одбраната: Мурати „аут“ четири натпревари
Тренерот Баже Јанакиевски се соочува со сериозен кадровски проблем во пресрет на овој дуел. Иако дефанзивата на Кумановци делуваше одлично на последните три меча (примен само еден гол), денеска ќе мора да се снајдат без столбот во одбраната, Реџеп Мурати. Клучниот дефанзивец заработи суспензија од дури четири натпревари, што ќе биде голем тест за задната линија на Башкими.
Травали со посебни емоции против „своите“
Натпреварот ќе биде под посебна лупа за Фодај Травали. Офанзивецот, кој во јануари пристигна во Куманово токму од Струмица, признава дека дуелот против неговиот поранешен клуб АП Брера буди посебни чувства.
„Секогаш е прекрасно чувство да се игра против поранешниот клуб и соиграчи, но мојот фокус е исклучиво на Башкими. Знаеме колку е важен овој натпревар за нас. Целосно сме подготвени и фокусирани на освојување на трите бода“, изјави Травали пред денешниот меч.
Тој додава дека и покрај респектот кон квалитетот на струмичани, верува дека Башкими има капацитет да ги задржи бодовите дома.
Натпреварот во Куманово започнува во 14:00 часот.
