Додека најдобрите осум екипи од лигашката фаза (како Арсенал и Баерн) одмараат и го чекаат својот противник во осминафиналето, останатите 16 тима кои завршија од 9-то до 24-то место се подготвени за „војна“. Плеј-оф рундата започнува денес и утре, а влогот е огромен – место меѓу елитата во март или предвремено збогување со Европа.
Реал Мадрид пред нов кошмар наречен „Бенфика“
Најголемото изненадување е присуството на 15-кратниот шампион Реал Мадрид во оваа фаза. „Кралевите“ ја пропуштија шансата за директен пласман по оној нереален пораз од 4:2 против Бенфика, каде голманот Трубин постигна гол со глава во последната секунда.
Судбината сакаше Жозе Мурињо и неговата Бенфика повторно да му застанат на патот на Реал. Статистиката на „Опта“ вели дека Реал е фаворит со 60% шанси за премин, но по лекцијата во Лисабон, никој не смее да се обложи против „Специјалниот“.
ПСЖ по стапките на минатата сезона, Интер против норвешкиот „џин-убиец“
Актуелниот шампион ПСЖ се наоѓа во слична ситуација како лани, па повторно мора да помине преку француски ривал во плеј-офот. Овојпат противник е Монако. Минатата година ПСЖ го „згази“ Брест со вкупен резултат од 10:0 во оваа фаза и стигна до титулата, па навивачите во Париз се надеваат дека историјата ќе се повтори.
Од друга страна, минатогодишниот финалист Интер има навидум лесна задача против Бодо/Глимт, но Норвежаните веќе ги „зедоа скалповите“ на Манчестер Сити и Атлетико Мадрид сезонава, па италијанскиот гигант ќе мора да биде исклучително претпазлив.
Кој е најсигурен, а каде ќе биде најгусто?
Според проекциите, најголем фаворит за пласман понатаму е Њукасл (90% шанси) против Карабах, и покрај нивната променлива форма во Премиер лигата.
Најнеизвесно се очекува да биде во дуелот помеѓу Борусија Дортмунд и Аталанта. Германците имаат блага предност од 56%, но со оглед на напаѓачкиот стил на тимот од Бергамо, тука се можни сите сценарија.
Патот до Будимпешта
Првите натпревари се играат вечерва и утре (17/18 февруари), а реваншите се веќе следната недела. Победниците ќе им се приклучат на „големите осум“ во ждрепката за осминафиналето која е закажана за петок, 27 февруари. Финалето оваа година се игра на прекрасната „Пушкаш Арена“ во Будимпешта на 30 мај.
