Германскиот тенисер Александар Зверев уште еднаш покажа дека црвената земја во Париз е негов природен терен. Во првото машко полуфинале на теренот „Филип Шатрие“, третиот светски рекет успеа да го сопре налетот на младата чешка сензација Јакуб Меншик и по голема борба триумфираше со 7-5, 6-2, 3-6, 6-3. Со оваа голема победа, Зверев во недела повторно ќе го нападне престижниот трофеј и ќе се обиде конечно да го скрши своето Грен слем проклетство.
„Најтешкиот предизвик досега“: Зверев со огромна почит за чешкиот тинејџер
Веднаш по завршувањето на исцрпувачкиот меч, Александар Зверев во своето интервју на самиот терен не штедеше пофални зборови за неверојатниот турнир што го одигра неговиот млад противник. Германецот призна дека свесно влегол во дуелот очекувајќи максимален отпор од тинејџерот кој претходно елиминираше неколку големи тениски имиња во Париз.
„Неверојатно е како играше Меншик изминативе две недели. Тој победи толку многу неверојатни играчи и знаев дека ова ќе биде најтешкиот предизвик што сум го имал досега на турнирот. Успеав да се справам со тоа, победив и навистина сум среќен. Тој почна да игра нереално во третиот сет и го подигна својот тенис на сосем друго ниво. Ова е Грен слем турнир и мечеви кои се играат во пет сета, па вакви работи едноставно се случуваат. Противниците ќе играат подобро во одредени моменти, а вие мора да се соочите со тоа. Јас успеав и се надевам дека ќе одиграм уште еден одличен меч во недела“, истакна Зверев.
Израмнување на рекордот на Ферер и лов на првата Грен слем круна
За 29-годишниот Германец ова ќе биде вкупно четврто големо Грен слем финале во неговата кариера. Зверев зад себе веќе има три болни порази во мечевите за титула – заврши како вицешампион на УС Опен во 2020 година, на Ролан Гарос во 2024 година и на Австралијан Опен во 2025 година. Токму затоа, неделниот меч за него има историска тежина и претставува веројатно најважниот испит во неговиот тениски живот.
Со овој триумф над незгодниот Меншик, Зверев стигна до својата 44. победа на Ролан Гарос, со што се израмни со легендарниот Давид Ферер на 10-то место по бројот на победи во машка конкуренција во Опен ерата на парискиот грен слем. Неговата јубилејна 45. победа во недела би му го донела она што го сонува цела кариера – првиот мејџор трофеј. Негов противник во големото финале ќе биде подобриот од италијанската пресметка меѓу Флавио Коболи и Матео Арналди.
