Фудбалот уште еднаш падна во сенка на геополитичките тензии. Европската куќа на фудбалот (УЕФА), по препорака на британската полиција, донесе драстична одлука: да им забрани на навивачите на Макаби Тел Авив да присуствуваат на гостувањето кај Астон Вила во Бирмингем, во рамките на Лига Европа.
Одлуката е донесена поради “сериозни безбедносни ризици” и страв од потенцијални немири и протести, но истата предизвика лавина од реакции, од одобрување до жестоки критики од највисоките политички кругови во Велика Британија.
Зошто дојде до забраната? Инцидентите во Амстердам како предупредување
Полицијата на Вест Мидлендс го класифицираше натпреварот како “високоризичен”, наведувајќи две главни причини:
- Потенцијални протести: Бирмингем е град со голема муслиманска популација (околу 30%) и е сцена на чести про-палестински демонстрации. Полицијата стравува дека не би можела да се справи со евентуални протести и судири.
- Инцидентите во Амстердам: Минатата година, гостувањето на Макаби кај Ајакс во Амстердам беше проследено со огромни нереди. Според извештаите, навивачите на Макаби марширале низ градот со националистички и анти-арапски скандирања, уништувале палестински знамиња и напаѓале локални жители, што предизвикало жесток одговор од локалното население и хулиганите на Ајакс.
“Ова е исправна одлука. Тие навивачи се насилници и само би предизвикале проблеми”, “По она што го направија во Амстердам, треба целосно да им се забранат гостувања”, беа дел од коментарите кои ја поддржаа одлуката.
Британскиот премиер: “Погрешна одлука, нема да толерираме антисемитизам!”
Одлуката, сепак, наиде на жестока осуда од британскиот политички врв. Премиерот Кир Стармер ја нарече одлуката “погрешна”. “Ова е погрешна одлука. Нема да толерираме антисемитизам на нашите улици. Улогата на полицијата е да им овозможи на сите навивачи да уживаат во фудбалот, без страв од насилство”, изјави Стармер.
Бројни еврејски организации, како и израелскиот министер за надворешни работи, ја оценија одлуката како “срамна” и како “попуштање пред насилното малцинство”. “Наместо да се соочат со омразата, властите ги казнуваат жртвите”, изјавија од Кампањата против антисемитизам.
Зошто израелските клубови не се суспендирани?
Целата ситуација ја отвори и пошироката дебата, зошто израелските клубови, по примерот на руските, не се целосно суспендирани од натпреварувањата на УЕФА? “Русија и сите нејзини клубови се суспендирани, а за Израел има молк”, “Зошто воопшто играат во Европа?”, се прашуваат многумина.
Одговорот, според аналитичарите, е политички. “Повеќето западни влади, вклучувајќи го и домаќинот на следното СП, гордо го поддржуваат Израел, па затоа нема мнозинство кое би побарало такво нешто”, гласи една од анализите.
На крајот, ова е само уште еден тажен пример за тоа како фудбалот станува заложник на политиката, а најголеми губитници се спортот и вистинските навивачи.
