Ливерпул под водство на Арне Слот запиша втор пораз по ред, нешто што се има случено само еднаш досега во неговата ера. Во Истанбул, Галатасарај славеше со 1-0 благодарение на пеналот на Виктор Осимен, а англискиот шампион покажа нови слабости што веќе почнуваат да го загрижуваат навивачкиот табор.
Дали недостасуваше Салах?
Кога Мохамед Салах не е во почетниот состав, очекувано сите зборуваат за тоа. Египќанецот не е во најдобра форма од стартот на сезоната, па Слот реши да ротира. Но, Ливерпул изгледаше безидејно во нападот, каде што единствена светла точка беше Екитике со својата брзина и агресија. Кога конечно влегоа Салах и Исак, тимот доби малку повеќе динамика, но не доволно за пресврт.
Зошто повторно падна Ливерпул?
Тимот на Слот изгледаше несигурно и без јасна структура. Честопати губеше топка во средината, што Галатасарај умешно го казнуваше со брзи транзиции. Ибраима Конате имаше уште една неубедлива партија, а петти натпревар по ред Ливерпул не успеа да задржи “чиста мрежа”. Недостатокот на баланс меѓу одбраната и средниот ред е проблем кој останува нерешен уште од стартот на сезоната.
Пеналот – строг или заслужен?
Во 16-та минута, после пропуштена шанса на Екитике, една невнимателна интервенција на Сзобослаи над Јилмаз донесе најстрога казна. Контактот постоеше, но многумина сметаат дека падот на Јилмаз беше премногу театрален. Сепак, судиите во Европа често се построги во вакви ситуации. Осимен беше прецизен и го реши натпреварот уште во првиот дел.
Повредата на Алисон – удар за Слот
Најтешкиот момент за Ливерпул дојде во 56-та минута. Алисон, кој со одлична интервенција го спречи Осимен да зголеми, почувствува болка при повратниот спринт и веднаш побара замена. Бразилецот ќе го пропушти дуелот со Челси викендов, а можно е да отсуствува подолго. Со оглед на тоа што замената Келехер веќе замина во Брентфорд, сега новиот “број два” Мамардашвили ќе добие шанса да се докаже.
Треба ли Слот да биде загрижен?
Сè уште е рано за зборови како “криза”, но симптомите се јасни: две последователни слаби изданија, пропустливост во одбраната и повреди на клучни играчи. Со тешка серија натпревари што следи, како гостувањето кај Челси и дербито со Манчестер Јунајтед, Слот мора брзо да најде формула за стабилност. Во спротивно, оваа сезона може да добие многу непосакуван тек.
Ливерпул има талент и длабочина, но за првпат под Слот се чувствува кревкост. Истанбул можеби е само предупредување или пак сигнал дека пред тимот следат бурни недели.
