Македонскиот ракометен шампион, Еурофарм Пелистер, ја започна реконструкцијата на тимот за пролетниот дел од сезоната. Првото име кое го напушта „Боро Чурлевски“ е египетскиот репрезентативец Мохамед Калид Валид.
Клубот и ракометарот договорија спогодбен раскин на соработката по само една полусезона помината во Битола. Иако Валид дојде како големо засилување на линијата од шест метри, двете страни се согласија дека е време за промена.
Успеси со „зелено-белите“
За време на својот краток престој во Битола, Валид беше дел од ротацијата на Рубен Гарабаја и Звонко Шундовски. Со екипата успеа да се радува на трофејот во Суперкупот на Македонија, а забележа и солидни настапи во домашната Суперлига и во елитната Лига на шампиони.
„Двете страни беа согласни за промена и затоа оваа операција е брзо завршена. Му благодариме на Калид Валид за неговиот придонес и му посакуваме среќа во понатамошната кариера“, соопштија од битолскиот клуб.
Овој потег на управата на Пелистер најавува дека во преодниот рок може да се очекуваат нови имиња кои ќе треба да му помогнат на тимот во одбрана на титулата и во битките на меѓународна сцена.
