На ден кога машкиот турнир на Ролан Гарос доживеа вистински земјотрес со шокантната елиминација на Јаник Синер, Арина Сабаленка се погрижи да нема ново сензационално изненадување во Париз. Првиот светски рекет преживеа сериозен почетен притисок од домашната надеж Елса Жакемо, за на крајот моќно да ја завери визата за третата рунда.
Иако почетокот најавуваше драма, Белорусинката покажа зошто е на самиот врв, префрлајќи во повисока брзина кога тоа беше најпотребно.
Будењето на „ѕверот“ по налетот на Французинката
Носена од гласната домашна публика, 23-годишната Жакемо го играше тенисот на својот живот. Таа успеа да се врати од брејк негатива, а потоа спаси и сет-топка за да израмни на 5-5 во првиот сет, предизвикувајќи вистински делириум на трибините.
Но, токму тој момент ја разбуди 28-годишната Сабаленка. Првата носителка освои пет последователни гејма, трасирајќи го патот кон конечен триумф од 7-5, 6-2. За тоа колку беше доминантна по тој пресвртен момент говори и фактот што Сабаленка освои осум од последните десет гејма, забележувајќи дури 45 винери и одземајќи го сервисот на противничката пет пати. Со оваа победа, финалистката од 2025 година го подобри својот скор на париската земја на 24-8, односно 29-3 во тековната сезона. Во третото коло, Сабаленка ја очекува пресметка против Дарија Касаткина.
R3 🔜#RolandGarros pic.twitter.com/RXpptnr5Zx
— Roland-Garros (@rolandgarros) May 28, 2026
„Се потсетив дека сум навистина силна!“
По натпреварот, Сабаленка призна дека предизвикот воопшто не бил наивен и му оддаде признание на противникот.
„Ова беше незгоден натпревар против незгоден противник. Таа играше навистина неверојатен тенис, што ме принуди да влезам во теренот и да играм на друго ниво. Среќна сум што можев да се справам со тоа и да ја остварам победата,“ изјави Сабаленка.
Таа објасни дека клучот за триумфот лежел во самодовербата и физичката подготвеност во најтесните моменти од мечот.
„Само се обидував да се потсетам себеси дека сум навистина силна, дека можам да се справам и дека морам да работам што е можно побрзо со нозете. Само да го забрзам рекетот, да останам агресивна и да ѝ извршам што е можно поголем притисок. Супер сум среќна што бев во можност да го подигнам нивото во тие навистина тесни и клучни моменти од мечот“, заклучи светската тенисерка број еден.
