Она што малкумина го очекуваа, се случи вечерва во преполната „Јиске Банк Боксен“ арена. Данска, актуелниот светски и олимписки шампион, капитулираше пред налетот на Португалија со 29-31. Овој резултат не само што ја елиминираше Македонија од понатамошниот тек, туку направи вистински земјотрес во ракометна Европа. Сега, Португалија во главната фаза пренесува максимални два бода, додека моќната Данска ќе стартува од нула!
Натпреварот беше ревија на врвен ракомет, но и на неверојатни промашувања на домаќините. Иако Емил Нилсен блескаше на голот на Данска во почетокот на вториот дел, а Симон Питлик (кој контраверзно беше прогласен за играч на натпреварот од страна на ЕХФ и покрај браќата Кошта) го влечеше тимот со своите мајстории, тоа не беше доволно да се сопре португалската машина.
Браќата Кошта: Ракометна поезија во црвено и зелено
Ако некој се прашуваше кој е иднината на европскиот ракомет, одговорот вечерва стигна преку браќата Кошта. Франциско „Кико“ и Мартим Кошта одиграа натпревар кој долго ќе се прераскажува.
Мартим Кошта го одигра веројатно мечот на кариерата, покажувајќи неверојатна зрелост против најсилната одбрана на светот. И двајцата браќа завршија со по 9 гола, буквално „торпедирајќи“ го данскиот гол во клучните моменти. Кога Данците се обидоа да се вратат по исклучувањето на Итуриза во финишот, токму ладнокрвноста на браќата Кошта и двата гола на искуниот Антонио Ареја ја запечатија историската победа на „Хероите на морето“.
Крај на патот за Македонија
Со овој резултат, табелата во групата Б го доби својот конечен изглед:
- 🇵🇹 Португалија – 5 бода (пренесува 2)
- 🇩🇰 Данска – 4 бода (пренесува 0)
- 🇲🇰 Македонија – 3 бода
- 🇷🇴 Романија – 0 бодови
