Светот на тенисот вчера доживеа вистинска драма, откако се појавија информации дека легендарната Серена Вилијамс ги поднела потребните документи за враќање на терените, само за таа експресно да ги демантира гласините на социјалните мрежи.
Драмата започна кога Меѓународната агенција за интегритет во тенисот (ITIA) за „ББЦ Спорт“ потврди дека 44-годишната Вилијамс повторно е ставена на листата на играчи регистрирани во базенот за допинг-тестирање. Нејзиното име се појави на најновиот документ објавен на 6 октомври.
Мистеријата на допинг-листата
Според строгите правила, секој пензиониран играч мора да биде достапен за допинг-тестирање надвор од натпреварувањата најмалку шест месеци пред да има право повторно професионално да се натпреварува. Со оглед на тоа што Серена е на листата од 6 октомври, тоа теоретски би значело дека нејзиното враќање би било можно од април 2026 година.
Но, само неколку часа откако оваа вест одекна во јавноста, освојувачката на 23 Грен слем титули се огласи на социјалните мрежи со децидна порака: „НЕ се враќам. Овој ‘шумски пожар’ (гласините) е луд.“
„Еволуирање“ од тенисот
Зошто Серена би побарала нејзиното име да биде додадено на листата, што значи подложување на ненајавени посети од допинг-контролори, без намера повторно да игра, останува мистерија.
Серена никогаш не го сакаше зборот „пензионирање“, претпочитајќи да каже дека „еволуира подалеку“ од спортот кога се повлече по УС Опен во 2022 година. Нејзиниот последен меч беше епски дуел против Ајла Томљановиќ, каде што спаси пет меч-топки пред емотивно да се збогува на стадионот „Артур Еш“.
Интригата е уште поголема бидејќи нејзината постара сестра, Венус Вилијамс (45), веќе направи кам-бек по 16 месеци пауза. За навивачите, идејата за повторно обединување на сестрите Вилијамс во 2026 година сепак останува привлечна, и покрај демантот на Серена.
