Ролан Гарос уште во првите денови ни ја понуди целата убавина и суровост на тенисот. Додека светскиот рекет број еден, Јаник Синер, рутински и моќно ја започна својата мисија за освојување на Париз, тамошната публика сведочеше на две огромни сензации денес – елиминацијата на Данил Медведев и раѓањето на една нова 17-годишна француска ѕвезда.
Незапирливиот Синер ја запиша 30-та победа по ред
Враќањето на Јаник Синер на теренот „Филип Шатрие“ сигурно ги разбуди спомените од минатогодишното болно финале против Карлос Алкараз, но Италијанецот покажа дека е подготвен за одмазда и искупување. Првиот носител без никакви проблеми го прегази францускиот тенисер Клеман Табур со 3-0 во сетови (6-1, 6-3, 6-4).
Back on Chatrier and back with a win ✅#RolandGarros pic.twitter.com/FMOo6AkMQG
— Roland-Garros (@rolandgarros) May 26, 2026
Со 40 директни винери (двојно повеќе од противникот) и без ниту една дозволена брејк-топка во текот на целиот меч кој траеше нешто повеќе од два часа, Синер ја запиша својата јубилејна 30-та последователна победа, нестварна серија која трае уште од февруари.
„Многу сум среќен што сум повторно тука. Ова е многу посебно место за мене и имам одлични спомени. Првите кола никогаш не се лесни, но уште поспецијално е да се започне турнирот во вечерната сесија“, изјави мотивираниот Синер, кој јасно стави до знаење дека годинава атакува на пехарот.
Шок за Медведев: Австралиец со луд распоред го исфрли шестиот носител
Вистинскиот земјотрес се случи на теренот „Сузан Ленглен“, каде Данил Медведев доживеа шокантна елиминација. Поранешниот светски рекет број еден загуби во исцрпувачки маратон од пет сета од 97-от тенисер во светот, Адам Волтон со 6-2, 1-6, 6-1, 1-6, 6-4. Рускиот тенисер ја продолжи својата „клетва“ во Париз, каде сега има скор од 0-4 во натпревари во пет сета и дури седум елиминации во првото коло од неговите десет настапи на турнирот.
Приказната на Волтон е вистинско лудило. За да собере бодови и да обезбеди пласман на турнирите, Австралиецот изминатиов период патуваше на релација Хјустон – Јужна Кореја – Мадрид – Кина, за на крајот да слета во Париз и да ја оствари победата на кариерата.
„Јас сум во добра форма, но првите кола овде во Париз очигледно ми се најтешки. Можеби следната година ќе морам да сменам нешто и да играм подготвителен турнир во неделата пред Ролан Гарос“, разочарано констатираше Медведев.
Раѓање на нова ѕвезда: 17-годишник го расплака Марин Чилиќ
Ако елиминацијата на Медведев беше големо изненадување, тоа што го направи 17-годишниот Моис Куаме е вистинска спортска бајка. Младиот Французин, кој игра со специјална покана и во моментов е на 318-то место на АТП листата, го победи освојувачот на Гранд Слем турнир и тениски ветеран Марин Чилиќ со 3-0 во сетови (7-6, 6-2, 6-1).
Предводен од неговиот тренер, поранешниот светски рекет број 7 Ришар Гаске, Куаме стана најмладиот тенисер кој стигнал до второто коло во Париз уште од далечната 1991 година. Со неверојатна енергија и поддршка од домашната публика која во транс скандираше „Моис, Моис!“, младиот талент покажа нестварна зрелост и не му остави никакви шанси на искусниот Хрват по израмнетиот прв сет. Во следното коло го чека Камерон Нори или Адолфо Даниел Ваљехо.
