Јаник Синер продолжува да гази сè пред себе во калифорниската пустина. Вториот носител на Мастерсот во Индијан Велс експресно се пласираше во своето трето последователно полуфинале на овој турнир, откако со супериорна игра го совлада младиот Американец Лернер Тјен со 6-1 и 6-2.
Лекција по тенис за големиот талент
Иако 20-годишниот Тјен влезе во овој дуел со големи надежи и како најмлад американски четвртфиналист уште од времето на неговиот тренер Мајкл Ченг (1992), реалноста на теренот беше сурова. Синер беше методичен и немилосрден од првиот поен, искористувајќи го неискуството на противникот и неговите 19 неизнудени грешки од форхенд. Италијанецот го заврши мечот за само 66 минути, потврдувајќи дека во моментов е класа над останатите кога станува збор за стабилноста.
„Многу сум среќен. Да се игра против Лернер е тешко, тој напредува брзо и е огромен талент, но среќен сум што ја завршив работата во два сета“, изјави Синер по мечот.
Историски успех за Александар Зверев
Противник на Синер во полуфиналето ќе биде германскиот тенисер Александар Зверев, кој во четвртфиналето без поголеми проблеми го елиминираше Артур Филс со 6-2 и 6-3. Со овој триумф, Зверев стигна до импресивен јубилеј – тој стана само петтиот играч во историјата кој успеал да комплетира пласман во полуфинале на сите девет Мастерс 1000 турнири.
Овој успех е потврда за неговата константност на сите подлоги, но сега го чека најтешкиот можен предизвик. Иако меѓусебниот скор е 6-4 во корист на Зверев, Синер ги доби последните пет пресметки.
„Горд сум на овој рекорд, тоа е голема работа за мојата кариера. Дуелот со Јаник ќе биде огромен предизвик, последните мечеви ни беа тесни и со нетрпение ја чекам саботата“, истакна Зверев.
