Најдобриот светски тенисер во моментов, Јаник Синер, продолжува да доминира на АТП турнејата. Со победата над сонародникот Андреа Пелегрини во осминафиналето на Мастерсот во Рим (6-2, 6-3), Синер стигна до својата 31-ва последователна победа на турнирите од серијата 1000. Со овој успех, тој официјално го израмни апсолутниот рекорд на Новак Ѓоковиќ за најдолга победничка низа на Мастерс ниво.
Синер е на прагот на уште еден епски успех, бидејќи тој се обидува да стане само вториот тенисер во историјата (по Ѓоковиќ) кој ќе го комплетира т.н. „Golden Masters“, освојувајќи ги сите девет различни Мастерс турнири во кариерата.
Синер е „недопирлив“ во 2026 година
Италијанската ѕвезда игра во нестварна форма. Минатата недела во Мадрид тој стана првиот тенисер кој освоил пет последователни Мастерс титули (Париз, Индијан Велс, Мајами, Монте Карло и Мадрид). Неговиот последен пораз на ова ниво датира уште од октомври минатата година во Шангај.
„Среќен сум за исходот. Прекрасно е што има толку многу Италијанци во завршницата на турнирот. Ова беше добар меч за двајцата“, изјави Синер по победата, со која го подобри својот скор против сонародници на неверојатни 19-0.
Сензација: Дардери го шокираше Зверев по луд пресврт!
Денот во Рим го одбележа и неверојатниот пресврт на Лучијано Дардери, кој го елиминираше вториот носител Александар Зверев со 1-6, 7-6(10), 6-0. Дардери изведе вистинско чудо спасувајќи дури четири меч-топки во тај-брејкот од вториот сет, пред целосно да го збрише Германецот во одлучувачкиот сет.
За 24-годишниот Дардери ова е прво Мастерс четвртфинале во кариерата и прва победа над топ-10 тенисер.
„Победив поради публиката. Овде не смеете да се предадете. Ова е турнирот на мојот живот“, изјави Дардери.
Новата ѕвезда е родена: Рафаел Ходар гази по стапките на Надал и Ѓоковиќ
Шпанското чудо од дете, 19-годишниот Рафаел Ходар, стана првиот тинејџер по Новак Ѓоковиќ (2007) кој стигнал до четвртфиналето во Рим. Ходар го совлада Американецот Лернер Тиен со 6-1, 6-4 и со тоа стана највисоко рангираниот тинејџер на АТП листата.
Ходар оваа сезона веќе има 15 победи на земја, со што е лидер на турнејата заедно со Ечевери. Во четвртфиналето тој ќе се соочи токму со Лучијано Дардери во дуел кој ветува огромен спектакл.
