Мадридското сонце беше заменето со бура на небото, но Јаник Синер не дозволи никакво изненадување на теренот на „Естадио Маноло Сантана“. Првиот светски рекет успеа да ја прекине „бајката“ на локалниот миленик Рафаел Ходар, совладувајќи го со 6-2 и 7-6(0) по речиси два часа борба во четвртфиналето на Мадрид Опен 2026.
𝗛𝗨𝗚𝗘 𝗥𝗘𝗦𝗣𝗘𝗖𝗧 🇮🇹🤝🇪🇸@atptour | @ATPTour_ES | #MMOPEN pic.twitter.com/k8zeoqxSw4
— #MMOPEN (@MutuaMadridOpen) April 29, 2026
Искуството пресудно во клучните моменти
Иако резултатот во првиот сет сугерира лесна доминација на Синер, младиот 19-годишен Шпанец покажа зошто целиот Мадрид зборува за него. Синер прв направи брејк за 3-2 со атрактивен бекхенд-винер, а потоа искористи неколку грешки на Ходар за убедливо да го добие првиот дел.
Вистинската драма се одвиваше во вториот сет. Ходар не се предаде и во два наврати имаше сериозни шанси да го одземе сервисот на Италијанецот. Сепак, Синер покажа зошто е на врвот и спаси дури седум брејк-топки во текот на целиот меч, од кои пет во клучните моменти од вториот сет. Кога работата стигна до тајбрејк, искуството на Синер беше очигледно; тој ги освои последните десет поени во мечот, вклучувајќи го и тајбрејкот со перфектни 7-0.
Пофалби од светскиот број 1: „Шпанија доби уште еден голем играч“
По завршувањето на мечот, Синер покажа огромна почит кон својот помлад противник. На камерата ја испиша пораката „Каков играч“, а потоа пред шпанската публика имаше само пофални зборови за Ходар.
„Неверојатен играч. Шпанија секогаш имала големи тенисери, а сега добивте уште еден. Мечот беше многу израмнет, во вториот сет имав и малку среќа, но и искуството си го направи своето. Сигурен сум дека ќе го гледаме на најголемите сцени уште многу пати“, изјави Синер.
Историски скок за Ходар
И покрај поразот, ова беше турнир за паметење за Рафаел Ходар. Пред очите на легендарниот Раул Гонзалес кој го бодреше од трибините, тинејџерот обезбеди огромен скок на АТП листата. Од наредниот понеделник, Ходар ќе го заземе 34-то место во светот, со што е на чекор да биде носител на претстојниот Ролан Гарос.
Синер во петок ќе се бори за место во финалето, каде го очекува подобриот од дуелот меѓу Артур Филс и Јиржи Лехечка, во својата потера по четвртата последовна АТП Мастерс 1000 титула оваа сезона.
