Вториот светски рекет, Јаник Синер, го продолжува својот марш кон „Саншајн Дабл“ (титули во Индијан Велс и Мајами во иста сезона). Италијанецот обезбеди пласман во четвртфиналето на Мастерсот во Мајами, откако по голема борба го совлада младиот Американец Алекс Мишелсен со 7-5, 7-6.
Шампионски нерви на Синер
Иако важеше за голем фаворит, Синер мораше да ги покаже сите свои квалитети за да го скрши отпорот на 40-тиот тенисер во светот. Мишелсен сервираше за израмнување во вториот сет при водство од 5-2, но Италијанецот во свој стил се врати во мечот, го избори тај-брејкот и ја запечати победата со својот 15-ти ас на мечот.
„Сервирав многу добро во клучните моменти и тоа ми помогна. Не беше лесно, условите беа сосема поинакви од вчерашниот ноќен меч, но успеав да се прилагодам“, изјави Синер, кој во четвртфиналето го чека пресметка со домашниот фаворит Френсис Тифо.
Шпанска сензација: Ландалусе не запира!
Најголемото изненадување на турнирот е 20-годишниот шпански квалификант Мартин Ландалусе. По елиминацијата на Хачанов, 151-от тенисер во светот го шокираше и Себастијан Корда, победувајќи го со 2-6, 7-6, 6-4.
Ова е неверојатен пад за Корда, кој во претходното коло го елиминираше Карлос Алкараз, но не успеа да ја искористи меч-топката во вториот сет против младиот Шпанец. Ландалусе победата емотивно ја посвети на својата неодамна почината баба.
Зверев закажа дуел со „џелатот“ на Медведев
Пласман во најдобрите осум обезбеди и третиот носител Александар Зверев, кој по два тај-брејка го совлада Французинот Халис. Германецот за влез во полуфиналето ќе се бори против Аргентинецот Франциско Серундоло, кој по победата над Медведев, синоќа рутински го елиминираше и Уго Хумберт (6-4, 6-3).
Четвртфинални двојки (Машки):
- Јаник Синер (2) – Френсис Тифо (19)
- Мартин Ландалусе (Q) – Јири Лехечка (21)
- Александар Зверев (3) – Франциско Серундоло (18)
- Томи Пол (22) – Артур Филс
