Бранителот на титулата на Австралија Опен, Јаник Синер, продолжува да гази сè пред себе во Мелбурн. Италијанскиот ас ја запиша својата 19-та победа во низа на овој турнир, совладувајќи го американскиот „бомбардер“ Бен Шелтон со максимални 6-3, 6-4, 6-4.
Со овој триумф, Синер не само што стигна до своето трето последователно полуфинале на Австралија Опен, туку и ја закажа долгоочекуваната пресметка против Новак Ѓоковиќ.
Лекција по тенис за експлозивниот Шелтон
Иако Шелтон е познат по својот разорен сервис, Синер денес покажа зошто моментално го има најдоброто враќање на сервис во светот. Италијанецот ги читаше сервисите на противникот како „отворена книга“, а кога ќе започнеше размена од основната линија, Шелтон едноставно немаше одговор за прецизноста и силината на ударите на Јаник.
Ова беше деветта победа во низа за Синер против леворакиот Американец, при што Италијанецот има неверојатна серија од 22 добиени сета по ред во нивните меѓусебни дуели.
Мала физичка криза во финишот?
И покрај доминантниот резултат, крајот на вториот и почетокот на третиот сет донесоа мала доза на загриженост за навивачите на Синер. Четирикратниот Грен слем шампион изгледаше како на момент да остана без енергија, неговиот интензитет опадна, а движењето по теренот беше малку „потешко“. Сепак, неговата ментална сила пресуди, Синер направи клучен брејк во финишот на третиот сет и ја затвори работата за нешто повеќе од два часа игра.
Спектакл во петок: Синер против Ѓоковиќ!
Сега сè е подготвено за одличен тениски спектакл во петок. Додека Ѓоковиќ помина во полуфиналето по предавањето на Музети, Синер доаѓа со полн капацитет и огромна самодоверба.
Дали „Машината“ од Сесто ќе го продолжи својот нестварен престој во Мелбурн или 10-кратниот шампион Ѓоковиќ ќе најде начин да ја прекине оваа серија?
