Синер повторно во финале! Италијанецот го „потопи“ Де Минор и влезе во битка за уште една круна во Торино

Јаник Синер изгледа како да е создаден за големата сцена во Торино. Бранителот на титулата обезбеди ново финале на АТП Финалето, трето по ред, откако по зрел и беспрекорно контролиран настап го совлада Алекс Де Минор со 7-5, 6-2 и ја продолжи својата неверојатна доминација над Австралиецот.

Синер не загуби ниту еден сет, ниту еден сервис-гем во групната фаза, и токму тоа самоуверено темпо го продолжи и денеска. Во првиот сет мораше да копа подлабоко од вообичаено, осмата брејк-топка конечно му донесе предност, а од тој момент Италијанецот ја смени брзината и ја презеде контролата врз мечот.

Во вториот сет, неговата комбинација од интензитет, брзина и чисти удари едноставно ја „згасна“ борбеноста на Де Минор. Со ова, Синер стана најмладиот играч после Лејтон Хјуит (2004) што играл три финалиња на завршниот АТП турнир.

Welcome to the @janniksin show ⭐️

The defending champion seals his 30th indoor hard court win and reaches the title decider on home soil once again!#NittoATPFinals pic.twitter.com/HNQBD9qza9

— ATP Tour (@atptour) November 15, 2025

Неверојатна низа од 30 победи во низа во сала

Последен пат Синер загуби меч во сала пред две години, во финалето на овој турнир, од Новак Ѓоковиќ. Оттогаш, Торино, Виена, Париз и Ротердам му се како приватен терен. Освои титули на сите, а двапати ја водеше и Италија до славје на Дејвис Купот.

Сега го чека уште еден голем предизвик: Карлос Алкарас или Феликс Оже-Алијасим. Кој и да излезе на мегдан, финалето ветува спектакл.

13-0: бројка која зборува сама за себе

Ова беше тринаесетта победа во низа на Синер против Де Минор. Австралиецот денеска кратко го замолкна преполнетиот „Иналпи Арена“ кога поведе со 0-40 на самиот старт, но кога не ги искористи шансите, беше јасно во кој правец тргнува мечот.

Де Минор се бранеше како во транс, стигнуваше топки што изгледаа недостижни и спаси седум брејк-топки, но при 5-5 Синер го проби бедемот со разорен бекхенд по линија. Од таму натаму, само лапна гас.

Во вториот сет работата ја заврши рутинирано: два рани брејка, 32 прецизни винери, 75% прв сервис и билет за финале за само еден час и 52 минути.

Што останува запишано?

• Сезоната на Де Минор завршува со рекордни 56 победи, првпат над 50 во една година.
• Синер стана само вториот играч во историјата (по Ѓоковиќ 2018) што стигнал до финале на овој турнир без да загуби сервис-гем, откако статистиката за сервис се води (од 1991).
• Италијанецот оваа недела ги задржа сите 40 сервис-гемови.

Следете нè: Facebook | Instagram | X