Претстојниот натпревар помеѓу Ливерпул и Вулверхемптон на „Енфилд“ нема да биде само обична битка за бодови. Ова е првпат двата поранешни клуба на Диого Жота да се сретнат откако португалскиот репрезентативец и неговиот брат Андре Силва трагично ги загубија животите во сообраќајна несреќа во Шпанија минатиот јули.
Почести за легендата која прерано замина
Најстарите синови на Жота, Динис и Дуарте, ќе бидат специјални маскоти и ќе истрчаат на теренот заедно со фудбалерите пред почетокот на мечот. Семејството на Жота, вклучувајќи ја сопругата Руте Кардосо и малата ќерка Мафалда, се почесни гости на клубот кој по трагедијата реши засекогаш да го повлече дресот со број 20 во негова чест.
Фудбалерите и стручниот штаб на Вулверхемптон, предводени од Роб Едвардс, во петокот го посетија „Енфилд“ за да положат цвеќе пред спомен-обележјето на Жота, кој за три години во нивниот дрес стана вистинска икона на клубот пред да се пресели во Ливерпул за 45 милиони фунти.
Порака од Арне Слот: „Енфилд“ е вашиот дом
Менаџерот на Ливерпул, Арне Слот, во својата колумна за натпреварот испрати трогателна порака до семејството на Португалецот, за кои ова е прв Божиќ без нивниот татко и сопруг.
„Не е мое место да кажувам каде да бараат утеха, доколку тоа е воопшто можно, но се надевам дека љубовта и почитта кои Диого сè уште ги генерира ќе им донесат барем малку спокој. Ова е првиот Божиќ без него и нашите мисли се со нив“, напиша Слот.
Жота за Ливерпул постигна 65 гола на 182 натпревари, но неговото наследство не се мери само со бројки. Навивачите на Коп веќе истакнаа транспарент кој најдобро ја опишува врската: „Руте, Динис, Дуарте, Мафалда – Енфилд секогаш ќе биде вашиот дом“.
