Манчестер Сити ќе се бори за својот 10-ти трофеј во Карабао купот, откако со убедливи 5-1 во вкупниот резултат го елиминираше актуелниот бранител на титулата, Њукасл. По победата од 2-0 на „Сент Џејмс Парк“, тимот на Пеп Гвардиола вечерва ја заврши работата пред своите навивачи славејќи со 3-1, закажувајќи спектакуларно финале против лидерот во Премиер лигата – Арсенал.
Египетска магија на „Етихад“
Додека Ерлинг Халанд одмараше на клупата, светлата на сцената ги украде Омар Мармуш. Египќанецот одигра симултанка во првото полувреме и за само 30 минути ги згасна сите надежи на „страчките“.
Првиот гол пристигна уште во 6-та минута по неспретната реакција на одбраната на гостите, а во 30-та минута Мармуш со глава ја зголеми предноста на 2-0. Пред крајот на првиот дел, во листата на стрелци се запиша и Тијани Рајндерс, кој најдобро се снајде во метежот за веќе недостижни 3-0 на мечот (5-0 вкупно).
Кошмарот на Еди Хау продолжува
Њукасл се обиде да возврати, но налетите на Гордон и Вилок беа сопрени од расположениот Џејмс Трафорд. Единствениот светол момент за гостите беше голот на Ентони Еланга во 62-та минута, што е прв гол за Њукасл на овој стадион по цели седум и пол години. Сепак, тоа беше само утеха за тимот кој минатата година го крена овој трофеј, а вечерва мораше да му го предаде на подобриот.
Мајсторот против ученикот на „Вембли“
Финалето закажано за 22 март на „Вембли“ ќе биде повеќе од обичен натпревар. Тоа ќе биде судир на „мајсторот“ Пеп Гвардиола против неговиот „ученик“ Микел Артета. Овој дуел ќе има и огромно психолошко значење во трката за титулата во Премиер лигата, каде Арсенал во моментов има шест бода предност пред „граѓаните“.
За Гвардиола ова е шанса за 19-ти трофеј во неговата неверојатна кариера во Сити, додека Арсенал ќе се обиде конечно да го симне Сити од тронот и да докаже дека ова е нивна година.
