Емоциите, адреналинот и фудбалската лудост по епското полуфинале во Атланта сè уште не стивнуваат. Додека Англичаните денес ги анализираат причините за уште еден болен и веќе виден крах, Аргентинците слават пласман во своето второ последователно финале на Светските првенства.
Архитектот на овој тим, Лионел Скалони, по натпреварот не се обидуваше да ги скрие емоциите, додека контроверзниот, но секогаш искрен голман Емилијано Мартинез брутално прецизно ја детектираше клучната грешка која ги испрати Англичаните во борба за третото место.
„Овој тим е уникатен, дресот бара сè од нас“
За Лионел Скалони, оваа победа е многу повеќе од обичен спортски триумф. Аргентинскиот селектор истакна дека тешко наоѓа зборови за да ја опише радоста што овој тим ѝ ја носи на нацијата, потенцирајќи го нескршливиот дух на неговите играчи кои едноставно одбиваат да капитулираат.
„Останав без зборови. Ова е огромна среќа за нашата земја и за нашиот народ. Оваа група момци никогаш не престанува да ме изненадува и едноставно не знае што значи да бидеш победен. Луѓето тешко можат да разберат колку многу овие играчи даваат од себе на теренот. Ние сме уникатни. Тоа не е ароганција, тоа е чисто срце“, изјави емотивниот Скалони по натпреварот, заблагодарувајќи им се на илјадниците навивачи кои направија домашна атмосфера во Атланта. Тој додаде дека тежината на аргентинскиот дрес бара од нив да го остават и последниот атом сила на теренот.
Кукавичкиот потег на Англија кој Аргентина го намириса
Додека Скалони зборуваше за срцето и емоцијата, Емилијано „Дибу“ Мартинез фрли светло на тактичкото самоубиство на Англија. Голманот на Астон Вила, кој одлично го познава англискиот менталитет по 16 години поминати на Островот, посочи дека по примениот гол, Аргентина точно почувствувала како стравот се вовлекува во коските на противникот.
„Ние доминиравме во првото полувреме, но тие успеаја да поведат со тој еден центаршут. Сепак, ние сме навикнати да се враќаме од негатива. Она што веднаш го почувствувавме е како тие почнаа да се повлекуваат сè поназад и поназад. Кога водиш, понекогаш мораш да продолжиш да напаѓаш, не смееш да го менуваш планот на игра. Но, тие го направија токму тоа – ставија дополнителни дефанзивци и се затворија“, анализираше Мартинез. Тој додаде дека таквото длабоко бранење на Англија им дало предност, а клучен тактички потег за пробивање на тој бедем било извлекувањето на Лионел Меси на крилната позиција.
Чекор до вечноста против Шпанија
Сега, фокусот на „Гаучосите“ е целосно насочен кон големото финале в недела во Њујорк, каде ги чека извонредната Шпанија. За Мартинез, шансата да се одбрани светскиот трон е потврда за континуитетот на оваа златна генерација.
„Ова е нешто посебно. Посебно е за мојата земја, за семејството и за моите соиграчи. Да се биде во две последователни финалиња на Светско првенство значи дека она што го работиме е вистинскиот пат“, заклучи аргентинскиот чувар на мрежата.
