Контроверзии ја потресоа Шпанија откако телевизискиот пренос на натпреварот меѓу Реал Овиедо и Еспањол мистериозно ја пресече првата минута од играта, токму додека двата тима изведуваа координиран протест во времетраење од 15 секунди против одлуката на Ла Лига да го премести претстојниот натпревар на Барселона во Мајами. Цензурата предизвика лавина од критики кон раководството на лигата и нејзиниот контроверзен план за експанзија во САД.
Молк што одекна, но камерите се свртеа настрана
Ла Лига викендот го отвори со дуелот Реал Овиедо – Еспањол, но гледачите не ја видоа целата слика. Додека играчите стоеја на теренот 15 секунди, изразувајќи протест против натпреварот Барселона – Виљареал што треба да се одигра во Мајами, ТВ-преносот ненадејно се прекина. Кога сликата се врати, топката веќе беше во игра, а протестот исчезна од екраните.
Протестот беше организиран од Здружението на шпански фудбалери (AFE), кое ги повика сите клубови да паузираат на почетокот на своите натпревари како знак на револт кон “недостатокот на транспарентност, дијалог и доследност” во одлуката за натпревар во САД.
Иако Барселона и Виљареал, директно вклучените клубови, не учествуваа во акцијата, Овиедо и Еспањол со својот заеднички потег испратија јасна порака. Дури и кога камерите не ја прикажаа, публиката знаеше што се случува, а цензурата одекна во светските медиуми можеби погласно од тоа да беше прикажан натпреварот од стартот.
Зошто е контроверзен натпреварот во Мајами?
Одлуката на Ла Лига да одигра официјален натпревар од првенството надвор од Шпанија е историски преседент. Мечот Барселона – Виљареал е закажан за 20 декември на стадионот “Хард Рок” во Мајами, домот на НФЛ тимот Мајами Делфинс.
Планот предизвика отпор од ФИФА, Реал Мадрид и голем број играчи, кои тврдат дека ваквиот потег ги става комерцијалните интереси пред благосостојбата на фудбалерите и верните домашни навивачи.
AFE ја обвини Ла Лига за “упорни одбивања и нереални предлози” во обидите за преговори. “Играчите се главните актери во овој спорт, а со нив никој не се консултира”, стои во соопштението.
🚨 SCANDAL! 🤯
Real Oviedo and Espanyol players decided not to play for the first 30 seconds of the game today as a sign of protest against the Villarreal vs. Barcelona game being played in Miami… 🇺🇸
La Liga decided NOT to broadcast those moments of the match. 😬 pic.twitter.com/4hV5DS1BMZ
— Polymarket FC (@PolymarketFC) October 17, 2025
Навивачите на страната на играчите
Навивачките здруженија, меѓу кои и моќната Федерација на членови и акционери на шпанскиот фудбал (FASFE), повикаа фановите да им се придружат на протестите со аплауз во првите 15 секунди од секој меч овој викенд. Единството меѓу играчите и навивачите испраќа силна порака дека Ла Лига го губи контактот со вистинските вредности на шпанскиот фудбал.
Што мисли Барселона?
Во самиот клуб владеат поделени мислења. Од една страна, раководството го гледа мечот во Мајами како “огромна можност” за продор на северноамериканскиот пазар и дополнителни приходи, особено во услови на финансиски проблеми. Соработките со Најк Коби Брајант линијата и летните турнеи во САД се дел од таа стратегија.
Но играчите не се воодушевени. Капитенот Френки де Јонг отворено изјави:
“Го разбирам клубот од финансиски аспект, но како играч не би го направил тоа. Тоа не е добро за нас. Патувањата се долги, а натпреварот станува неправеден, за нас тоа е гостински меч на неутрален терен”.
Тренерот Ханси Флик исто така додаде:
“Играчите не се среќни, ниту јас. Но Ла Лига реши и ние мораме да играме”.
Критиките се засилија и поради густиот распоред сезонава. Барселона и Виљареал се дел и од Лигата на шампионите, а натпреварот во Мајами ќе биде само неколку дена пред зимската пауза, по што следува и ново патување во Саудиска Арабија за Суперкупот на Шпанија.
Дали ова е иднината на шпанскиот фудбал?
И покрај уверувањата на претседателот Жоан Лапорта дека клубот ќе игра “каде и да каже Ла Лига”, атмосферата во соблекувалната е напната. Многумина гледаат на целата приказна како на пример дека фудбалот сè повеќе им припаѓа на корпорациите, а сè помалку на луѓето што го создадоа – навивачите.
За сега, протестот на Овиедо и Еспањол повторно ја отвори старата дебата:
кому навистина му припаѓа фудбалот – на играчите и фановите, или на маркетинг машинеријата на Лигата?
🚨| BREAKING: La Liga footballers will protest this weekend by NOT playing football in first 15 SECONDS of every match.
They are protesting AGAINST Barcelona vs Villarreal playing an official match in Miami. pic.twitter.com/010JKHPL4l
— TheScreenshotLad (@thescreenlad) October 17, 2025
