Хрватскиот фудбал влегува во нова фаза. По историскиот крај на ерата на Златко Далиќ, кој со својот мандат го дефинираше најдобриот период на „Коцкестите“, Фудбалскиот сојуз на Хрватска (ХНС) брзо ја реши дилемата околу наследникот. Славен Билиќ, човекот кој го постави темелот на модерната хрватска репрезентација, официјално се враќа на селекторското столче.
Одлуката беше донесена едногласно на Извршниот одбор на ХНС, по предлог на претседателот Маријан Кустиќ, откако претходно доби целосна поддршка и од Стручната комисија на сојузот.
„Не е лесно да се наследи Далиќ, но Билиќ е вистинскиот човек“
Заминувањето на Златко Далиќ по завршувањето на Светското првенство означува крај на еден златен период во кој Хрватска беше светска фудбалска сила. Претседателот Кустиќ ја истакна тежината на оваа задача, но и довербата во новиот селектор.
„Му благодарам на Златко за сите резултати и ја почитуваме неговата одлука да стави крај на оваа ера. Свесни сме дека не е лесно да се наследи таков стручњак, но убедени сме дека Славен Билиќ е вистинската личност. Тој е прославен репрезентативец со огромно искуство и верувам дека ја ужива целосната поддршка од јавноста и играчите“, изјави првиот човек на хрватскиот фудбал.
Билиќ: Се враќам позрел, со истиот жар како во 2006 година
За Славен Билиќ, ова е враќање дома. Тој ја водеше Хрватска во периодот од 2006 до 2012 година, период кога ја создаде препознатливата „ватрена“ енергија на тимот. Билиќ признава дека очекувањата се огромни, но нагласува дека е подготвен за предизвикот.
„Да се води хрватската репрезентација е најголема чест за секој тренер од овие простори. Свесен сум за големите очекувања кои ги остави Златко Далиќ, но на тоа мора да биде подготвен секој што е на оваа позиција бидејќи Хрватска е нација што живее за фудбалот. Се чувствувам како позрел и поискусен тренер отколку во 2006 година, но со подеднаков мотив – Хрватска да остане моќна, одважна и успешна“, порача Билиќ.
Хрватската фудбалска јавност сега со нетрпение го очекува првиот настап на новиот-стар селектор. Билиќ ја презема репрезентацијата во момент кога се бара баланс меѓу искусните лидери и новите сили, а неговата енергија и амбиција се очекува да бидат главниот „ветар во грб“ за нови успеси на „Коцкестите“.
