Светското првенство во 2026 година донесе нереални фудбалски моменти, но турнирот во Северна Америка дефинитивно ќе остане запаметен и по огромното политичко влијание. Претседателот на САД, Доналд Трамп, кој имаше клучна улога во добивањето на организацијата на овој турнир заедно со Канада и Мексико, беше присутен на големото финале на „МетЛајф“ стадионот во Њу Џерси.
Но, пред воопшто да започне битката меѓу Шпанија и Аргентина, Трамп во интервју за мрежата Fox јасно му порача на претседателот на ФИФА, Џани Инфантино, дека САД ќе бараат организација на уште едно Светско првенство – и тоа веднаш!
„Ние сме фудбалска нација, стадионите беа преполни!“
Оценувајќи го турнирот како „прекрасен“, американскиот претседател истакна дека Соединетите Американски Држави дефинитивно станале фудбалска земја. Во интервјуто со новинарката Џени Тафт, тој дури откри и каков бизарен предлог му дал на првиот човек на светскиот фудбал.
„Имав една одлична идеја за Џани. Му реков: ‘Мора да одберете две земји. Најавете нè нас повторно за следниот пат, а потоа најавете некоја друга земја после нас. Тоа ќе го намали гневот и шокот кај останатите.’ Врз основа на бројките што ги видовме, ние ќе бараме организација повторно, и тоа веднаш“, изјави Трамп.
Тој додаде дека стадионите биле исполнети до последното место: „Мислев дека ќе бидат 99.9 проценти полни, но веројатно згрешив бидејќи всушност претекуваа од луѓе. Мора да го направиме ова повторно, и мора да го направиме додека сум јас наоколу. Слушаш ли, Џани?“
Со оглед на тоа што Мундијалот во 2030 година ќе се игра во Шпанија, Португалија и Мароко (со воведни мечеви во Јужна Америка), а 2034 година е резервирана за Саудиска Арабија, следниот слободен термин е дури во 2038 година, кога Трамп би имал 92 години.
Притисокот врз ФИФА и скандалот со Балогун
Односот меѓу Трамп и Инфантино беше под огромна лупа на светската јавност во текот на целиот турнир, а кулминираше со незапаметен преседан. Имено, по директен телефонски повик од американскиот претседател до Инфантино, ФИФА ја поништи суспензијата за црвениот картон на американскиот репрезентативец Фоларин Балогун, овозможувајќи му да игра во осминафиналето против Белгија.
И покрај бројните повици за оставка на Инфантино поради ваквото политичко мешање, Трамп останува на ставот дека соработката е беспрекорна: „Не мислам дека некогаш се случило нешто слично на ова Светско првенство. Ова е прекрасна работа за гледање и навистина му оддавам признание на Џани“.
За крај, тој им го додели трофејот на фудбалерите на Шпанија, но сакаше да остане на сцената за да биде дел од победничкото славје. Иако Џани Инфантино пробуваше да го убеди својот пријател да се поттргне, сепак Трамп остана на пиедесталот за да слави со Шпанците.
