Селекторот на Мароко го објави конечниот список од 26 фудбалери за претстојното Светско првенство 2026 година, на кое „атласките лавови“ доаѓаат како голема фудбалска сила и моментално осмопласирана селекција на ФИФА ранг-листата. По историскиот мундијалски пласман во полуфиналето во Катар 2026 и контроверзно доделената титула на Африканскиот куп на нации минатата година, Мароканците во Северна Америка патуваат со највисоки амбиции.
Главната и најважна вест за нацијата е вклучувањето на капитенот и прва ѕвезда на тимот, Ашраф Хакими, и покрај силните главоболки кои дефанзивецот ги имаше со повредата во изминатиот период.
أسود الأطلس جاهزون لكأس العالم 🌍🏆
— Équipe du Maroc (@EnMaroc) May 26, 2026
🚨 The Atlas Lions are ready for the World Cup 👊#DimaMaghrib 🇲🇦 pic.twitter.com/BsJoHXNTWF
Трка со времето за Хакими и големо финале во ЛШ на хоризонтот
Десниот бек на ПСЖ доживеа повреда за време на полуфиналните битки во Лигата на шампионите против Баерн Минхен и нема одиграно ниту една минута уште од првиот натпревар кој се одигра на 28 април. Сепак, денеска пристигнаа фантастични вести: 27-годишниот капитен беше снимен како тренира со полн интензитет со соиграчите, што е јасен знак дека тој ќе биде подготвен за саботното големо финале во Лигата на шампионите против Арсенал, а потоа и за мундијалскиот поход.
Наспроти добрите вести за Хакими, најголемото изненадување на списокот е бруталното отсуство на Хаким Зијеш. Поранешниот крилен напаѓач на Челси целосно извиси и воопшто не се најде меѓу 26-те избраници на селекторот, што веднаш отвори дебати во тамошната јавност.
Мундијалски мозаик од европски елитни клубови
Списокот на Мароко зрачи со сериозен квалитет и фудбалери кои настапуваат во најсилните лиги на Стариот континент. Нападот ќе биде предводен од ѕвездата на Реал Мадрид, Брахим Дијаз, како и одличното младо крило на Сандерленд, Чемсдин Талби.
Дефанзивниот бедем изгледа застрашувачки со Нусаир Мазрауи од Манчестер Јунајтед, Иса Диоп од Вест Хем и Чади Риад од Кристал Палас, додека средниот ред ќе го диригираат Софијан Амрабат (Реал Бетис) и Билал Ел Ханус (Штутгарт). На голот, се разбира, неприкосновен е Јасин Боно.
Мароко се наоѓа во исклучително атрактивната група Ц, заедно со селекциите на Бразил, Хаити и Шкотска, а токму против Шкотите ја отвораат мундијалската сметка на 19 јуни.
КОМПЛЕТНИОТ СОСТАВ НА МАРОКО ЗА СП 2026:
Голмани: Јасин Буну (Ал Хилал), Мунир Мохамеди (РС Беркан), Ахмед Тагнаути (Ројал Армед Форсес).
Одбрана: Нусаир Мазрауи (Манчестер Јунајтед), Анас Салах-Един (ПСВ Ајндховен), Јусеф Беламари (Ал Ахли), Најеф Агуерд (Марсеј), Чади Риад (Кристал Палас), Иса Диоп (Вест Хем), Редуан Халхал (Мехелен), Ашраф Хакими (ПСЖ), Закарија Ел Уахди (Генк).
Средина: Самир Ел Мурабет (Стразбур), Ајуб Буади (Лил), Неил Ел Ајнауи (Рома), Софијан Амрабат (Реал Бетис), Азедин Унахи (Жирона), Билал Ел Ханус (Штутгарт), Исмаел Саибари (ПСВ Ајндховен).
Напад: Абдесамад Езалзули (Реал Бетис), Чемсдин Талби (Сандерленд), Суфиан Рахими (Ал Аин), Ајуб Ел Кааби (Олимпијакос), Брахим Дијаз (Реал Мадрид), Јасин Гесим (Стразбур), Ајуб Амаимуни-Ешгујабе (Ајнтрахт Франкфурт).
