Карлос Алкараз продолжува да гази на Австралија Опен, но неговата победа во третото коло против Корентан Муте (6-2, 6-4, 6-1) беше многу повеќе од обичен резултат. Публиката на „Род Лејвер Арената“ уживаше во вистински тениски спектакл, каде двајцата тенисери се натпреваруваа кој ќе изведе поатрактивен потег.
Натпревар во „дроп-шотови“
Иако Алкараз доминираше на семафорот, тој призна дека Французинот му задал сериозни главоболки со неговиот специфичен стил на игра. Муте, кој е познат како еден од најголемите „трик-мајстори“ во тенисот, постојано го принудуваше Шпанецот да трча на мрежа.
„Во еден момент на крајот од третиот сет му кажав на мојот тим: Не трчам по ниту еден дроп-шот повеќе! Бев преморен од постојаното движење кон мрежата, погледнав на екранот и видов дека сум истрчал напред 55 пати. Мислев дека сме во натпревар за дроп-шотови, а тој дефинитивно победи во тоа“, се пошегува Алкараз по мечот.
Staying on track 🛤️@carlosalcaraz moves past Moutet in straight sets.@wwos • @espn • @tntsports • @wowowtennis • #AO26 pic.twitter.com/Wc6eTbe1yz
— #AusOpen (@AustralianOpen) January 23, 2026
Тензија, танци и наклон пред публиката
Мечот започна со многу насмевки и меѓусебно признание за добрите потези, но тензијата се зголеми во вториот сет кога Муте успеа да врати еден брејк и да врзе четири гема во низа. Сепак, Алкараз одговори како вистински шампион, го подигна нивото на својата игра и со карактеристичниот крик „Вамос!“ ја врати контролата.
Муте не престана со шоуто ниту кога губеше со 4-0 во третиот сет. По еден спектакуларен лоб-удар, тој почна да танцува на теренот, а по еден волеј и се поклони на публиката со што измами громогласен аплауз. Дури и му шепна на Алкараз дека подготвил посебен танц доколку успее да направи уште еден магичен потег, но Шпанецот реши да стави крај на забавата и да го затвори мечот по два часа и пет минути игра.
Never change, Corentin 😂🕺@wwos • @espn • @tntsports • @wowowtennis • #AO26 pic.twitter.com/VFQQINBGyq
— #AusOpen (@AustralianOpen) January 23, 2026
Следен предизвик: Томи Пол
Со оваа победа, Карлос Алкараз се пласираше во своето 15-то осминафинале на Грен слем турнирите. Следен противник ќе му биде 19-тиот носител, Американецот Томи Пол, против кого Шпанецот ќе мора да биде максимално фокусиран доколку сака да продолжи кон трофејот во Мелбурн.
