Фудбалскиот свет доби нов, апсолутно заслужен владетел. Во финалето на Светското првенство во 2026 година на стадионот „МетЛајф“ во Њу Џерси, Шпанија по епска битка во продолженијата ја совлада Аргентина со 1-0, искачувајќи се на светскиот трон по вторпат во својата историја.
Херој на „црвената фурија“ беше резервистот Феран Торес, кој во 106-та минута ја проби челичната, но и исклучително агресивна одбрана на десетмината „Гаучоси“. Натпреварот не го донесе очекуваниот спектакуларен лелеав фудбал, туку се претвори во исцрпувачка тактичка војна во која Шпанија се обидуваше да игра фудбал, додека Аргентина со сите сили се обидуваше да го уништи ритамот на противникот. За нас гледачите од Македонија дополнително мачно беше да се следи лошиот пренос на Арена, но за тоа потоа деновиве. Сега да се фокусираме на финалето на уште едно Светско првенство.
Пропадна планот на Скалони: Шпанија го „удави“ Меси
Тактичкиот план на Луис де ла Фуенте функционираше беспрекорно. Шпанија примени агресивен и висок пресинг, принудувајќи ја Аргентина да се брани во длабок блок и целосно отсекувајќи го Лионел Меси од играта. 39-годишниот капитен на Аргентина го одигра својот најтивок натпревар на турнирот – во првите 15 минути имаше само еден допир со топката (од самиот центар при почетокот на мечот), а првото полувреме го заврши со мизерни 15 допири.
Кога и да се обидеше Меси да се извлече на десната страна за да креира магија, веднаш беше удвојуван од шпанските дефанзивци. Најзаслужен за ова фудбалско „гушење“ беше феноменалниот Родри. Добитникот на Златната топка за 2024 година одигра фантастично добар меч, ги контролираше сите транзиции, ги сечеше сите контранапади и уште еднаш докажа дека е тактички најзначајниот фудбалер на денешницата. Како резултат на таа доминација, Аргентина не упати ниту еден единствен удар во рамките на голот во првите 90 минути.
Глупоста на Енцо Фернандез и војната на нерви
Наместо фудбалска убавина, публиката гледаше нервозна игра исполнета со остри стартови. Шпанците постојано приговараа кај словенечкиот судија Славко Винчиќ за неговиот преблаг критериум, особено по бруталниот старт на Алексис Мек Алистер врз Дани Олмо уште во 15-тата минута кој помина неказнето. Првиот жолт картон дојде дури во 41-вата минута кога Лисандро Мартинез грубо го покоси Ојарзабал, а дефанзивецот на Манчестер Јунајтед набрзо потоа мораше да го напушти теренот поради повреда.
Натпреварот комплетно експлодираше во судиското продолжение од регуларниот дел. Енцо Фернандез, кој претходно веќе имаше жолт картон за приговор, направи катастрофално глупав и непромислен старт, лансирајќи го младиот шпански дефанзивец Пау Кубарси во воздухот. Винчиќ немаше избор – му покажа втор жолт картон и ја остави Аргентина со 10 играчи на теренот пред почетокот на продолженијата.
Еми Мартинез правеше чуда, но Феран Торес пресуди во 106′
Дека Аргентина воопшто стигна до продолженија е заслуга единствено на нивниот голман Емилијано Мартинез. Популарниот „Дибу“ во финишот на регуларниот дел одбрани спектакуларен слободен удар на Ламин Јамал, а потоа во продолженијата со брутални рефлекси го спречи и ударот со глава на Нико Вилијамс. Шпанија дури имаше и гол кој беше поништен поради наводен прекршок на Микел Мерино врз Отаменди.
Но, притисокот на „црвената фурија“ конечно вроди со плод во 106-та минута при нивниот 20-ти шут кон голот. Педро Поро упати прекрасен длабок центаршут, Нико Вилијамс мајсторски со глава ја врати топката во петерецот, а таму на вистинското место се најде Феран Торес кој со силен удар од непосредна близина ја закова топката во мрежата за тотално лудило на шпанскиот дел од трибините.
Американски „Супер Боул“ кој го уништи фудбалскиот ритам
Ова Светско првенство ќе остане запаметено и по тоа што Америка реши максимално да го комерцијализира најголемиот настан. Натпреварот го проследи и претседателот Доналд Трамп, кој пристигна на стадионот со флота од хеликоптери, но најголемата контроверзија беше полувремето.
За првпат во мундијалската историја, паузата меѓу двете полувремиња траеше дури 27 минути за да се скрати простор за мега-шоу во стилот на „Супер Боул“. Мадона (која влезе во стадионот на количка управувана од бразилските легенди Роналдо Назарио и Роналдињо), Џастин Бибер, БТС, Шакира и Колдплеј приредија забавен спектакл, но со тоа целосно го убија натпреварувачкиот ритам на фудбалерите, што дополнително придонесе за слабиот квалитет на играта во вториот дел.
Крај на една ера за Меси, Мбапе е со Златната копачка
Со овој пораз, Лионел Меси ја заврши својата мундијалска приказна со горчлив вкус на стадионот каде што во 2016 година првпат прогласи репрезентативна пензија по поразот од Чиле. Иако неговата мундијалска кариера завршува со сребро, неговото наследство со три светски финалиња и една титула останува недопирливо во историјата.
Од друга страна, Килијан Мбапе и официјално ја освои Златната копачка на овој турнир, завршувајќи со 10 постигнати голови, со што стана првиот фудбалер во историјата кој двапати ја освоил оваа престижна награда на Светските првенства, предводејќи ја и вечната мундијалска листа со вкупно 22 гола.
Сепак, трофејот оди во Мадрид и Барселона. Шпанија ја заврши оваа мундијалска кампања како најдобрата дефанзивна екипа со само еден примен гол на целиот турнир и со тоа докажа дека сосема заслужено застануваат на врвот на светот.
