Во моментите кога фудбалскиот свет треба да зборува за групи, дербија и возбудата од претстојното Светско првенство во 2026 година, ФИФА и нејзиниот претседател Џани Инфантино успеаја да го киднапираат вниманието со еден од најсрамните потези во историјата на спортот.
На свечената ждрепка во Вашингтон, американскиот претседател Доналд Трамп беше награден со новоизмислената „ФИФА Мировна награда“ (FIFA Peace Prize). Да, добро прочитавте. Човекот чија политика е предмет на поделби, доби признание за „обединување на светот“ од организација која статутарно треба да биде политички неутрална.
Циркус во режија на Инфантино
Џани Инфантино, човекот кој наводно го спаси фудбалот од корупцијата на Блатер, сега го претвора во алатка за задоволување на политички ега.
„Ова е медал што можеш да го носиш каде и да одиш“, му рече Инфантино на Трамп, додека му врачуваше златен трофеј со раце кои ја држат земјината топка.
За многумина, ова е чист акт на сервилност. Трамп, кој отворено лобираше за Нобелова награда за мир, сега ја доби оваа „утешна“ награда од својот близок пријател Џани, во потег што многумина го толкуваат како очајнички обид на ФИФА да си обезбеди поддршка за организацијата на турнирот во САД.
„Не ми требаат награди, само сакам да спасувам животи“
Во свој стил, Трамп ја прими наградата со доза на лажна скромност: „Не ми требаат награди. Само сакам да спасувам животи… Ова е една од најголемите почести во мојот живот“.
Зошто ова е опасно?
Ова не е само лош ПР. Ова е преседан. ФИФА, која со години казнува играчи и федерации за најмали политички пораки (сетете се на казните за знамиња, пораки на маици), сега му дава награда на активен политичар, среде мандат, во екот на глобални конфликти.
- Дали ова значи дека фудбалот станува официјална платформа за политичка пропаганда?
- Што е следно? Златна топка за Путин? Награда за фер-плеј за Ким Џонг Ун?
Свесни сме дека политиката и спортот отсекогаш биле испреплетени, но ова е брутално силување на здравиот разум. Наместо да се слави играта, се слави моќта. Наместо да се зборува за Меси и Мбапе, се зборува за Трамп и Инфантино.
Модерниот фудбал можеби умира, но љубовта кон вистинската игра е она што нè држи. Ова што го прави ФИФА не е фудбал. Ова е евтин театар со скапи влезници.
