Назначувањето на Лијам Росениор за нов менаџер на Челси е потег со кој сопствениците на „сините“ бараат еволуција на проектот. Човекот кој во својата филозофија сака да го комбинира „убавото со практичното“, доаѓа на „Стемфорд Бриџ“ со јасна визија: да го трансформира поседот на топката во смртоносно оружје.
Еве ги клучните тактички промени што можеме да ги очекуваме од Росениор:
„Мамење“ на противникот (Press-baiting)
Росениор е голем поклоник на стилот што го практикува Унаи Емери. Неговата идеја е тимот да разменува голем број кратки пасови во сопствената половина, не за да го „успие“ противникот, туку за да го испровоцира да излезе во висок пресинг. Штом противникот ќе ја напушти својата зона, Челси под Росениор ќе бара експресно пробивање на линиите со вертикални додавања.
Голманот како „оутфилд“ играч
Ова е можеби најрадикалниот дел од тактиката на Росениор. Тој бара од својот голман (Роберт Санчез) да стои исклучително високо кога тимот има посед, речиси како трет стопер. Ова создава вишок играч во фазата на градење на нападот, но носи и огромен ризик. Во Стразбур, неговите голмани имаа најмногу допири со топка надвор од казнениот простор во цела Лига 1.
Флексибилност и „Среден блок“
За разлика од Енцо Мареска, кој често инсистираше на екстремно висок пресинг, Росениор е попрагматичен. Кога тимот нема посед, тој претпочита цврст 4-4-2 блок во средината на теренот. Оваа поставеност му овозможува на тимот да остане компактен и да ја намали веројатноста за примање лесни голови од контранапади.
Напаѓачки фокус
Иако ја сака топката во свои нозе, Росениор инвестира во брзи и продорни играчи. Под негово водство, Лијам Делап би можел да биде клучниот напаѓач кој ќе ги користи празните простори што ќе ги создаваат креативците како Кол Палмер и Педро Нето.
Предвиден состав на Челси (4-2-3-1): Санчез; Џејмс, Фофана, Колвил, Кукуреља; Фернандез, Каиседо; Естевао, Палмер, Нето; Делап.
