Турскиот фудбалски гигант Бешикташ е на прагот да реализира еден од најголемите и најсензационалните трансфери ова лето. Според најновите информации од Турција и Италија, раководството на „Црно-белите“ постигнало целосен договор со поранешниот напаѓач на Јувентус и Фиорентина, Душан Влаховиќ.
Дваесет и шестгодишниот српски репрезентативец се очекува да пристигне во Истанбул в среда напладне за да ги мине задолжителните медицински прегледи пред официјално да стави потпис на договорот.
Огромен договор и обединување со Италијано
Влаховиќ пристигнува во Бешикташ како слободен играч, откако неговиот договор со Јувентус истече на 30 јуни. Иако имаше интерес од клубови ширум Европа, никој не беше подготвен да ги исполни неговите високи финансиски барања, кои изнесуваа околу 12 милиони евра нето плата по сезона во Торино.
Турскиот клуб понуди пакет кој Влаховиќ не можеше да го одбие. Договорот ќе биде со важност од три години (до 2029), со загарантирана годишна плата од 8 до 10 милиони евра заедно со дополнителни перформанс-бонуси. Исто така, напаѓачот и неговиот агент ќе добијат огромен бонус при самото потпишување, кој според италијанските медиуми би можел да достигне и до 20 милиони евра.
Клучна улога во овој трансфер одигра новиот стратег на Бешикташ, Винченцо Италијано. Токму под негово водство во Фиорентина, Влаховиќ ја играше својата најдобра сезона (кога заврши како втор стрелец во Серија А со 24 голови), што му го донесе и скапиот трансфер во Јувентус од над 80 милиони евра. Операцијата за доведување на Србинот во Истанбул ја финализираше германскиот спортски директор на Бешикташ, Едуард Граф, кој одржа директни преговори во Белград.
Крај на бледата етапа во Јувентус
Влаховиќ ја напушта Италија по пет сезони поминати во дресот на Јувентус. На 168 одиграни натпревари во сите натпреварувања, тој постигна 68 погодоци. Неговата последна сезона беше статистички најслаба, со само седум голови на 19 настапи во Серија А, а единствениот трофеј кој го освои со „Старата дама“ беше Купот на Италија во 2024 година.
Ова е второ огромно засилување за нападот на Бешикташ ова лето. Клубот претходно го осигура потписот на белгискиот репрезентативец Леандро Тросар од Арсенал, што јасно ги покажува огромните амбиции на тимот да ја врати шампионската титула во своите витрини во новата сезона.
