Англискиот мундијалски сон заврши на веќе виден, суров начин. Предноста од 1-0 се претвори во кошмар во последните минути, а нацијата уште еднаш бара одговори за тактичкиот страв кој ја парализираше репрезентацијата. На мета на јавноста очекувано е селекторот Томас Тухел, чија одлука да се повлече во длабока дефанзива и да игра со петмина во одбраната се покажа како фатална против Аргентина.
По натпреварот, германскиот стратег ја презеде одговорноста, призна дека тимот станал премногу пасивен, но не пропушти можност иронично да им возврати на бројните критичари кои го обвинуваат за кукавички пристап, истакнувајќи дека не жали за своите одлуки.
Пасивноста која го уби сонот
Тухел беше свесен дека по голот на Ентони Гордон во 55-та минута, Англија целосно ја загуби контролата врз натпреварот. Наместо да го искористат моментумот, фудбалерите на „Гордиот Албион“ беа „напикани“ во сопствениот шеснаесеттник.
„Разочарани сме, бевме толку блиску, но станавме премногу пасивни откако постигнавме гол и дозволивме премногу шанси. Не можевме да ја свртиме ситуацијата со поседот на топката и дозволивме премногу нафрлувања и удари. Бевме блиску, но не можевме да го задржиме нивото. Сакавме да одиме на втор гол, но тоа не помага ако воопшто не можете да дојдете до топката. Не можевме да излеземе од нашата половина“, ја објасни Тухел ситуацијата на теренот.
Дефанзивно алиби и иронична порака до јавноста
Најголемите критики кон Тухел се насочени кон неговите замени, особено вадењето на стрелецот Гордон за внесување на дефанзивецот Конса, што беше јасен сигнал за тотално повлекување. Сепак, Германецот жестоко ја брани својата одлука, тврдејќи дека морало да се реагира на аргентинскиот притисок.
„Тие го добиваа секој воздушен дуел, постојано нафрлуваа, па затоа преминавме на игра со петмина во одбраната за да ги затвориме празнините внатре и да бидеме посилни во воздухот. Веднаш по нашиот гол, уште пред замените, дозволивме премногу простор. Морав да донесам одлука на теренот. Се разбира, одговорноста е кај тренерот, и кога работите нема да завршат добро, најлесно е да се каже дека одлуката била погрешна“, изјави Тухел, пред да испрати иронична порака: „Нема проблем, ги разбирам овие дискусии во јавноста. Сега има милиони тренери по натпреварот кои знаат подобро од мене“.
„Не жалам за ништо“
Иако Англија испушти историска шанса, Тухел одбива да ја наведне главата. За него, овој натпревар бил можеби најдобриот на турнирот со оглед на околностите, а карактерот на екипата останува за почит.
„Во овој момент, немам за што да жалам. Тимот даде сè од себе и бевме многу, многу блиску. Заслуживме да водиме со 1-0. Ова беше можеби нашиот најдобар натпревар на турнирот. Пребродивме сè – патувања, играње на надморска височина, играње со 10 играчи, пеколните горештини… Ова не е момент за целосна анализа на турнирот, ние едноставно испаднавме затоа што загубивме еден клучен натпревар“, заклучи германскиот стручњак.
Фудбалската јавност во Англија, сепак, тешко ќе ги проголта овие зборови. Да се биде на пет минути до финале на Светско првенство и да се избере страв наместо храброст е нешто што историјата ретко го простува.
