Најтрофејниот македонски ракометен бренд, РК Вардар, започнува уникатна акција со која сака да ги обедини сите генерации кои го граделе клубот. Под мотото „Биди дел од историјата“, клубот објави повик до сите навивачи и колекционери – вашите стари, ретро дресови сега можат да станат дел од новата трофејна соба!
Потрага по „чуварите“ на емоциите
Целта на оваа иницијатива е да се комплетира историскиот мозаик на Вардар. Се бараат оригинални дресови од сите изминати сезони, кои се добро сочувани и за кои се знае точно од кој период потекнуваат. Секој дрес носи своја приказна, победа и емоција, а сега тие моменти ќе бидат зачувани на едно место за идните генерации „Комити“.
Вардар не останува должен: Кралски награди за донаторите
Клубот знае да ја цени лојалноста, па затоа за секој прифатен дрес кој ќе стане дел од поставката, донаторот ќе биде богато награден:
- Нов официјален дрес или комплет од тековната сезона.
- Сезонски билет за сите натпревари на Вардар.
- VIP пристап на натпреварите.
- Средба со тимот и организирана дружба со ракометарите.
Како да се пријавите?
Доколку во вашиот плакар чувате дрес кој заслужува да биде во витрините на Вардар, контактирајте го клубот на:
Е-пошта: contact@rkvardar1961.com
Телефон: 070 936 601
Или директно преку порака на нивните социјални мрежи.
Ова е шанса која не се пропушта – остави свој белег во клубот што го сакаш!
