Реал Мадрид доби тежок удар пред почетокот на елиминациите во Лигата на шампионите. Бразилецот Родриго ќе ги пропушти двата натпревари од плеј-оф рундата против Бенфика, откако УЕФА му изрече суспензија од два меча поради „навредлив јазик“ упатен кон судијата.
Минута лудило со тешки последици
Инцидентот се случи на крајот од јануари, за време на драматичниот пораз на Реал од Бенфика (4-2) во последното коло од лигашката фаза. Родриго, кој во својата кариера во Мадрид никогаш претходно не беше исклучен, заработи два жолти картони во рок од само една минута. Причината? Бурна реакција и недоличен речник упатен кон италијанскиот судија Давиде Маса.
Иако Бразилецот веднаш се извини на социјалните мрежи, објаснувајќи дека го понеле емоциите поради задржувањето на времето од страна на противникот, УЕФА остана доследна на своите строги правила. Ова значи дека Арбелоа нема да може да смета на него за дуелите на 17 и 25 февруари.
Проблемите за Арбелоа се трупаат
Отсуството на Родриго не е единствената главоболка за „кралскиот клуб“. Реал Мадрид стравува дека за пресметките со тимот на Жозе Мурињо ќе го нема и Џуд Белингем. Англиската суперѕвезда се здоби со повреда на тетивата на мечот против Рајо Ваљекано и според првичните прогнози, би можел да отсуствува околу еден месец.
Да потсетиме, Бенфика направи вистинско чудо за да стигне до овој плеј-оф, откако голманот Анатолиј Трубин постигна гол во 98-та минута против Реал, со што целосно ја промени сезоната за португалскиот гигант. Сега, со ослабен напад, Реал ќе мора да бара одмазда на многу потежок начин.
