Уште 100 дена до Светското првенство: Најголемиот спектакл во историјата или геополитичка „бомба“?

Денеска, светот официјално започнува да ги брои последните 100 дена до почетокот на Светското првенство во фудбал 2026. Ова треба да биде „најголемото шоу на планетата“ – екстраваганца со 48 репрезентации, 104 натпревари и 16 градови домаќини низ САД, Канада и Мексико.

Претседателот на ФИФА, Џани Инфантино, веќе го нарекува ова „најголемиот настан што човештвото некогаш го видело“. Бројките го потврдуваат тоа: се очекува ангажман од шест милијарди луѓе, а само во првиот месец пристигнале над 50 милиони барања за билети.

Но, додека се подготвуваме за магиите на Меси, Роналдо, Мбапе и Халанд, чувството овојпат е поинакво. Наместо вообичаената еуфорија, светот гледа кон овој Мундијал со доза на вознемиреност. Светското првенство кое најчесто обединува, овој пат влева едно поинакво чувство.

Спектакл во сенка на немири

За разлика од претходните првенства во Русија и Катар, каде главните грижи беа навивачките хулигани или правата на работниците, патот до 2026 е исполнет со досега невидени политички тензии.

• Визи и имиграција: Поради строгите контроли во САД, навивачите на неколку квалификувани земји (како Сенегал, Хаити и Иран) се соочуваат со неизвесност дали воопшто ќе добијат влезни визи.
• Безбедносни предизвици: Од протести против федералните агенти во Минеаполис, па сè до неодамнешните ескалации меѓу мексиканските власти и картелите во Гвадалахара, безбедноста е под голем знак прашалник.
• Блискоисточната криза: Воените тензии меѓу САД и Иран ја ставаат под знак прашалник групата Г, каде Иран треба да игра против Белгија, Египет и Нов Зеланд. Светот стравува од првиот голем бојкот на Мундијал по повеќе од седум децении.

Who's next? 💭

In 100 days, a new chapter begins. 🏆#FIFAWorldCup pic.twitter.com/7ARQEfQbVa

— FIFA World Cup (@FIFAWorldCup) March 3, 2026

Фудбалот како последен бастион на надежта

И покрај црните сценарија, ФИФА останува на својата мисија под слоганот „Фудбалот го обединува светот“. Ова лето ќе биде последен танц за легендите како Меси, Роналдо и Модриќ, но и деби на големата сцена за аутсајдери како Узбекистан, Јордан и Кабо Верде.

Географски и емотивно, фудбалот секогаш успевал да ги премости јазовите што политиката ги создавала. На 11 јуни, кога Мексико ќе го отвори првенството против Јужна Африка на преполниот „Ацтека“ стадион, сите овие проблеми ќе бидат ставени на пауза за 90 минути.

Прашањето е само едно: Дали овој Мундијал ќе биде запаметен по головите и радоста на стадионите, или по турбулентното време во кое се одржува? Едно е сигурно – за 100 дена, светот ќе застане.

Следете нè: Facebook | Instagram | X