Светскиот шампион во Формула 1 од 2025 година, Ландо Норис, ја потврди својата долгорочна иднина во спортот откако стави потпис на нов договор со Мекларен. Британскиот возач се обврза на верност кон тимот од Вокинг најмалку до крајот на 2030 година, со опција за дополнително продолжување, ставајќи крај на сите шпекулации и осигурувајќи стабилност во походот кон нови титули.
Доверба, рекорди и шампионско педигре
Приказната помеѓу Норис и Мекларен е вистинска спортска романса која започна во 2017 година, кога тогаш 17-годишниот Британец пристигна како тест и развоен возач. Од неговото деби како главен возач во 2019 година, Норис израсна во вистински лидер на тимот. Досега има запишано 13 гран-при победи, 18 пол-позиции и 48 подиуми, а круната на соработката беше освојувањето на светската титула минатата година. Со 163 извозени трки, тој веќе е апсолутен рекордер со најмногу настапи во историјата на Мекларен.
„Мекларен е мојот дом. Кога го започнав ова патување пред девет години, имав јасна цел – да го вратам тимот на врвот и да освојувам шампионати. Го постигнавме тоа, но сакаме уште повеќе, знаеме дека сме способни за тоа“, изјави Норис, кој како посебен подарок за новиот договор од тимот го доби шампионскиот болид MCL39 со кој лани ја освои титулата.
Градење нова династија и заклучување на возачкиот тандем
Одлуката за предвремено продолжување на договорот (претходниот истекуваше на крајот од 2027 година) доаѓа како стратешки потег на извршниот директор Зак Браун и шефот на тимот Андреа Стела. Со оглед на тоа што неговиот клупски колега Оскар Пијастри има договор до 2028 година, Мекларен го има заклучено еден од најсилните возачки тандеми во Формула 1 за следните неколку сезони, обезбедувајќи мир и континуитет во гаражата.
„Ландо помогна да го однесеме Мекларен во нова ера на успех, од дното на гридот до две последователни конструкторски титули во 2024 и 2025 година, како и наша прва возачка круна по 17 години. Неговите достигнувања зборуваат сами за себе“, потенцираше гордиот Зак Браун.
A message from Lando 🧡#McLarenF1 | #LN4MoreYears pic.twitter.com/T8FGqYV2qC
— McLaren Mastercard Formula 1 Team (@McLarenF1) August 29, 2026
Подготовка за долгогодишно ривалство со Верстапен
Овој договор носи уште една интересна димензија во Формула 1. Имено, со обврзувањето до 2030 година, договорот на Норис сега временски се израмнува со оној на неговиот голем ривал и пријател на патеката, Макс Верстапен, кој претходно го продолжи престојот во Ред Бул. Ова најавува епска, долгогодишна битка меѓу двајцата врвни возачи кои ќе ги предводат своите тимови во новата ера на авто-мото спортот.
