По четиригодишна доминација на врвот на Формула 1, Макс Верстапен се подготвува за нова реалност. Откако Ландо Норис во драматична завршница го совлада за само два поени и ја прекина неговата шампионска серија, Холанѓанецот го потврди својот нов идентитет за сезоната 2026.
Збогум за „единицата“ и „33-ката“
Со оглед на тоа што Ландо Норис како нов светски шампион добива право да го носи бројот 1, Верстапен мораше да избере нов број за својот болид. Иако многумина очекуваа враќање на неговиот препознатлив број 33, со кој дебитираше во Торо Росо и ја освои првата титула во 2021 година, Макс реши да изненади.
Од 2026 година, на болидот на Ред Бул ќе стои само бројот 3.
„Наследство“ од Даниел Рикардо
Бројот 3 до неодамна беше заштитен знак на Даниел Рикардо, поранешниот тимски колега на Макс, кој се повлече од спортот во 2024 година. Верстапен откри дека веќе добил дозвола и од ФИА и лично од Рикардо за да го преземе овој број.
„Мојот омилен број отсекогаш бил 3, секако веднаш по единицата. Бројот 33 беше во ред, но секогаш повеќе сакав една тројка отколку две. Порано велев дека 33 ми носи двојна среќа, но јас веќе ја потрошив мојата среќа во Формула 1. И 69 е многу убав број, но жена ми рече дека нема шанси“, се пошегува Верстапен во негов стил, во интервјуто за „Viaplay“.
Подготовки за новата ера
Оваа промена доаѓа во предвечерјето на големите промени во правилата во 2026 година. Додека Норис и Мекларен слават по историскиот триумф во Абу Даби, Верстапен веќе го крои планот за враќање на врвот, овојпат со нов број и нов мотив.
