Вечерва во 21:00 часот, „Камп Ноу“ ќе биде сведок на уште еден потенцијално историски натпревар. Барселона го пречекува Атлетико Мадрид во реванш-дуелот од полуфиналето на Копа дел Реј, со една единствена и екстремно тешка цел: да ја анулира негативата од огромни 0:4 од првиот натпревар.
Флик: „Да го направиме невозможното – возможно“
Германскиот стратег Ханси Флик не бега од реалноста, но неговата порака пред натпреварот е јасна – предавањето не е опција. Иако Барса има планина за качување, Флик верува во силата на својот тим.
„Заостануваме четири гола и мораме да го направиме невозможното – возможно. Тоа е целта. Мораме да бидеме паметни, да ги добиваме дуелите и да не губиме посед, бидејќи тие се опасни во транзиција. Треба да постигнеме по два гола во секое полувреме“, истакна Флик.
„Ре монтада“ е во гените на Барса
Навивачите на Барса веќе знаат како изгледаат чудата. Сите се сеќаваат на легендарните 6:1 против ПСЖ во 2017 година по истиот стартен резултат (0:4). Атмосферата во тимот е подигната по убедливите победи над Леванте (3:0) и Виљареал (4:1), а формата на Ламин Јамал, кој штотуку го постигна својот прв хет-трик во кариерата, им дава надеж на навивачите.
Добра вест за Флик е враќањето на Педри и Рафиња, како и на Маркус Рашфорд, кои го пропуштија првиот меч. Нивното присуство му дава на тимот сосема поинаква димензија во нападот.
Проблеми со повреди: Без Левандовски во клучниот бој
Сепак, патот до „ремонтада“ стана потежок по веста дека Роберт Левандовски ќе отсуствува поради скршеница на јаболчната коска. Покрај него, надвор од стројот се и Френки де Јонг (повреда на мускулот), како и суспендираниот Ерик Гарсија.
Од друга страна, Диего Симеоне доаѓа во Барселона со огромна предност, но и со голема претпазливост. Иако неговиот тим киксна во Ла Лига против Рајо Ваљекано, популарниот „Чоло“ е мајстор за бранење предност во куп-натпреварувања.
