Големото дерби на Ријад донесе сè што може да понуди фудбалот, гол на најголемата ѕвезда, пресврт, црвен картон и пенали. На крајот, Ал Хилал излезе како голем победник со 3-1 против Ал Наср, правејќи огромен чекор кон титулата во Саудиската Про Лига.
Кристијано Роналдо даде надеж, но „жолто-сините“ се распаднаа во второто полувреме, дозволувајќи му на тимот на Симоне Инзаги да избега на „плус седум“ на табелата.
Роналдо отвори, Ал-Акиди „затвори“
Првото полувреме му припадна на Ал Наср. Во 42-тата минута, по една одлична акција на Кингсли Коман и Жоао Феликс, топката стигна до Кристијано Роналдо, кој немилосрдно стрелаше за 0-1.
Сепак, второто полувреме донесе кошмар за гостите. Во 57-мата минута, Салем Ал-Давсари израмни од пенал откако Малком беше фаулиран.
Клучниот момент се случи само три минути подоцна. Голманот на Ал Наср, Наваф Ал-Акиди, направи непромислен потег и влезе во физички конфликт со Рубен Невес при обидот да ја земе топката по голот. ВАР снимката покажа ударање, што резултираше со директен црвен картон за голманот.
Ал Хилал не простува со играч повеќе
Со играч помалку, Ал Наср не можеше да издржи. Ал Хилал ја искористи бројчаната предност во 81-вата минута кога Мохамед Кано мајсторски реализираше по асистенцијата на Невес за 2-1.
Точка на натпреварот стави Рубен Невес длабоко во судиското надополнување (90+2′), реализирајќи го вториот пенал за Ал Хилал на натпреварот за конечни 3-1.
Со оваа победа, Ал Хилал сега има 38 бода, додека Ал Наср останува на 31 и е во серија од три порази по ред, што е најлошата низа за клубот од 2020 година.
