Трите победи по ред беа брзо заборавени. Њукасл Јунајтед доживеа непријатен пораз од 3-1 на гостувањето кај Вест Хем, ставајќи крај на добрата серија на тимот од северот на Англија.
Иако Џејкоб Марфи донесе рано водство во 4. минута, „Чеканите“ направија целосен пресврт. Лукас Пакета израмни (35’), пред несреќниот автогол на Свен Ботман (45’) да донесе водство за домаќините. Томас Соучек (90+7’) го потврди триумфот во судиското надополнување.
Хау: „Најлош настап сезонава, отворив истрага“
Менаџерот Еди Хау беше брутално искрен. Тој го опиша настапот како „најлош“ оваа сезона, признавајќи дека тимот немал „никаква енергија и физички интензитет“, иако ротирал играчи во средата за да бидат свежи.
Хау потврди дека веднаш по мечот отворил „истрага“ во соблекувалната со „искрени“ зборови кон играчите. „Бев многу искрен. Сега клучна ќе биде реакцијата на сите“, изјави тој.
Алан Ширер: „Ужасни, мрзеливи, летаргични!“
Легендата на клубот, Алан Ширер, беше уште подиректен. На социјалните мрежи, тој го „искасапи“ тимот.
„Тоа беше ужасно. Второто полувреме не беше ништо подобро. Ниту една позитивна работа. Мрзеливи. Без енергија. Летаргични. Браво за Вест Хем“, напиша Ширер.
That was awful. No better 2nd half. Not one positive. Lazy. Leggy. Lethargic. Well done West Ham. #WHUNEW
— Alan Shearer (@alanshearer) November 2, 2025
Поразот е уште поболен бидејќи дојде од Вест Хем (предводен од Нуно Еспирито Санто), кој ја забележа првата домашна победа во Премиер лигата уште од февруари. За Њукасл, ова значи продолжување на очајната серија на гости, каде сè уште немаат победа оваа сезона во лигата, паѓајќи на 13. место.
Дополнителен проблем е и потенцијалната повреда на Ентони Гордон, кој беше заменет на полувремето. Хау потврди дека играчот почувствувал проблем со колкот, иако додаде дека замените биле и од „тактичка природа“.
